Begin typing your search above and press return to search.
exit_to_app
exit_to_app
Homechevron_rightNewschevron_rightLocal Newschevron_rightKottayamchevron_rightഹൈറേഞ്ചിൽ കിതച്ച്​...

ഹൈറേഞ്ചിൽ കിതച്ച്​ കെ.എസ്​.ആർ.ടി.സി സി.എൻ.ജി ബസ്​: എൽ.എൻ.ജി എന്താകുമെന്ന്​ ആശങ്ക

text_fields
bookmark_border
ഹൈറേഞ്ചിൽ കിതച്ച്​ കെ.എസ്​.ആർ.ടി.സി  സി.എൻ.ജി ബസ്​: എൽ.എൻ.ജി എന്താകുമെന്ന്​ ആശങ്ക
cancel

കോട്ടയം: കെ.എസ്​.ആർ.ടി.സി ഏ​റെ കൊട്ടിഗ്​​േഘാഷിച്ച്​ ആരംഭിച്ച സി.എൻ.ജി ബസ്​ സർവിസിനിടെ കട്ടപ്പുറത്തായി. എറണാകുളത്തുനിന്ന്​ കട്ടപ്പനക്ക്​ യാത്ര തിരിച്ച ബസാണ്​ രണ്ടാം ദിവസവും ഹൈറേഞ്ചി​െൻറ കവാടത്തിൽ വീണുപോയത്​.

രാവിലെ എറണാകുളത്തുനിന്ന്​ യാ​ത്ര തുടങ്ങുന്ന ബസ്​ തലയോലപ്പറമ്പ്​, കോട്ടയം, പൊൻകുന്നം, മുണ്ടക്കയം, കുട്ടിക്കാനം, ഏലപ്പാറ വഴിയാണ്​ കട്ടപ്പനയിലെത്തുക. ലോക്​ഡൗൺ ഇളവുലഭിച്ചശേഷം ആദ്യമായി തിങ്കളാഴ്​ച കട്ടപ്പനയിലേക്ക്​ പോയ ബസ്​ പെരുവന്താനം മുതൽ കുട്ടിക്കാനം വരെ കയറ്റം കയറിയില്ല. പിന്നെ നിർത്തി നിർത്തിയാണ്​ കുട്ടിക്കാനം വരെ എത്തിച്ചത്​. തുടർന്ന്​ കട്ടപ്പനയിൽ പോയി തിരിച്ച്​ എറണാകുളത്ത്​ എത്തിച്ചു. ചൊവ്വാഴ്​ച​ രാവിലെ സർവിസിൽ പൊൻകുന്നം എത്തിയപ്പോഴേക്കും​ വീണ്ടും പണിമുടക്കി. യാത്രക്കാരെ മറ്റൊരു ബസിൽ കട്ടപ്പനക്ക്​ കൊണ്ടുപോയി. സി.എൻ.ജി ബസ്​ കോട്ടയത്തെ സർവിസ്​ സെൻററിലേക്ക്​ മാറ്റി. കെ.എസ്​.ആർ.ടി.സിയുടെ ഭാവി തീരുമാനിക്കുന്ന സാ​ങ്കേതികവിദ്യയെന്ന പേരിൽ അവതരിപ്പിക്കപ്പെട്ട സി.എൻ.ജി ബസി​െൻറ മോശം ​പ്രകടനം തൊഴിലാളികളും ആശങ്കയോടെയാണ്​ കാണുന്നത്​.

15 വർഷം പഴക്കമുള്ള ഡീസൽ ബസുകൾ ഏത്​ കയറ്റവും കയറുമെന്നിരിക്കെയാണ്​ പുതിയ സി.എൻ.ജി കിതച്ചു നിൽക്കുന്നതെന്ന്​ അവർ ചൂണ്ടിക്കാട്ടുന്നു. ഇതിനുപിന്നിൽ കോർപറേഷനിലെ മെക്കാനിക്കൽ, ഓപറേറ്റിങ്​ വിഭാഗങ്ങൾ തമ്മിലെ പടലപ്പിണക്കവും കാരണമാകുന്നുണ്ടെന്ന്​ ഒരു വിഭാഗം തൊഴിലാളികൾ പറയുന്നു. കെ.എസ്​.ആർ.ടി.സിയിലെ മെക്കാനിക്കൽ വിഭാഗവും ഒപ്പമുള്ള എൻജിനീയർമാരും സി.എൻ.ജി പദ്ധതിക്ക്​ എതിരാണ്​.

ഡീസൽ ബസാണെങ്കിൽ ലോക്കൽ പർച്ചേസ്​ വഴി ലഭിക്കുന്ന വലിയ കമീഷനിലാണ്​ ഇവർക്ക്​ താൽപര്യമെന്നും സി.എൻ.ജി ആയാൽ കുറവുവരുമെന്നുമാണ്​ ഓപറേറ്റിങ്​ വിഭാഗത്തിലുള്ളവർ ആരോപിക്കുന്നത്​. ആദ്യ എൽ.എൻ.ജി ബസ്​ ഉദ്​ഘാടനം ചെയ്യുകയും അടുത്തവർഷം 400 എൽ.എൻ.ജി ബസുകൾ നിരത്തിലിറക്കുമെന്ന ഗതാഗത മന്ത്രിയുടെ പ്രഖ്യാപനം വരുകയും ചെയ്​തതിന്​ പിറ്റേന്നുതന്നെ സി.എൻ.ജി ബസ്​ വഴിയിൽ കിടന്നത്​ കോർപറേഷനും നാണക്കേടായിട്ടുണ്ട്​. സംഭവത്തെക്കുറിച്ച്​ ഒന്നുമറിയില്ലെന്ന നിലപാടാണ്​ കോർപറേഷനിലെ ഉന്നത ഉദ്യോഗസ്ഥർക്കുള്ളത്​.

3000 ബസുകൾ സി.എൻ.ജിയിലേക്ക്​ മാറ്റാനുള്ള ശ്രമത്തിലാണ്​ കെ.എസ്​.ആർ.ടി.സി. ഇതുവഴി ഇന്ധനച്ചെലവിൽ പ്രതിവർഷം 40 മുതൽ 60 കോടിവരെ ലാഭിക്കാനാകുമെന്നാണ്​ കണക്കുകൂട്ടൽ. എന്നാൽ, പദ്ധതി പരാജയപ്പെട്ടാൽ നൂറുകണക്കിന്​ കോടി രൂപയുടെ അധിക ബാധ്യതകൂടി കെ.എസ്​.ആർ.ടി.സിക്ക്​ ഉണ്ടാകും. ഹൈറേഞ്ച്​ അടക്കം വിവിധ റൂട്ടുകളിൽ വിശദ പരീക്ഷണയോട്ടങ്ങൾ നടത്തി സർവിസുകൾ വിലയിരുത്തിയില്ലെങ്കിൽ സി.എൻ.ജിയും എൽ.എൻ.ജിയും കോർപറേഷന്​ ഇരുട്ടടി നൽകുമെന്ന മുന്നറിയിപ്പും ജീവനക്കാർ നൽകുന്നുണ്ട്​.

Show Full Article
TAGS:ksrtc high range 
News Summary - KSRTC in distress in high range
Next Story