കെ.എസ്.ആർ.ടി.സി ബസ് കാറിൽ തട്ടി; വൻ ഗതാഗതക്കുരുക്ക്

കോട്ടയം: റോഡരികിൽ പാർക്ക് ചെയ്തിരുന്ന കാറിൽ കെ.എസ്.ആർ.ടി.സി ബസ് തട്ടിയത് കഞ്ഞിക്കുഴിയിൽ വലിയ ഗതാഗതക്കുരുക്കിന് കാരണമായി. വെള്ളിയാഴ്ച ഉച്ചയ്ക്ക് 12.45 ഓടെ കഞ്ഞിക്കുഴി ജങ്ഷനിൽ കളത്തിപ്പടി ഭാഗത്തേക്കുള്ള റോഡിലാണ് സംഭവം. കോട്ടയത്തുനിന്ന് കുമളിക്കുപോയ കെ.എസ്.ആർ.ടി.സി ബസാണ് അപകടത്തിൽപ്പെട്ടത്.

കെ.എസ്.ആർ.ടി.സി ബസ് റോഡിനോട് ചേർന്ന് പാർക്ക് ചെയ്തിരുന്ന കാറിന്‍റെ ഒരുവശത്ത് തട്ടുകയായിരുന്നു. കാർ ബസിന്‍റെ ഒരുവശത്ത് ഉടക്കിനിന്നിരുന്നു. ഇതിനാൽ ബസ് മുന്നോട്ടെടുക്കാനായില്ല. കാറിൽ ഡ്രൈവറോ യാത്രക്കാരോ ഇല്ലാതിരുന്നതിനാൽ കാർ മാറ്റാനും കഴിഞ്ഞില്ല. ഇതോടെ യാത്രക്കാരും ജീവനക്കാരും പുറത്തിറങ്ങി. യാത്രക്കാർ മറ്റു ബസുകളിൽ കയറിപ്പോയി. ബസ് എടുത്തുമാറ്റാൻ കഴിയാതിരുന്നതോടെ ഗതാഗതം തടസ്സപ്പെട്ടു. കോട്ടയം ഭാഗത്തേക്കും വാഹനങ്ങളുടെ നീണ്ട നിരയായി. കുരുക്ക് കലക്ടറേറ്റ് ഭാഗത്തേക്ക് നീണ്ടതോടെ വാഹന യാത്രക്കാർ വലഞ്ഞു. വിവരമറിഞ്ഞ് പൊലീസും സ്ഥലത്തെത്തി. ബസ് തള്ളിമാറ്റിയ ശേഷമാണ് ഗതാഗത തടസ്സം പരിഹരിച്ചത്.