അസം സ്വദേശിയെ തട്ടിക്കൊണ്ടുപോയി പണംതട്ടിയ ഗുണ്ടാസംഘം അറസ്​റ്റിൽ

കോട്ടയം: നഗരമധ്യത്തിൽ അസം സ്വദേശിയെ തട്ടിക്കൊണ്ടുപോയി ഭീഷണിപ്പെടുത്തി പണംതട്ടിയ കേസിൽ നാലംഗസംഘം പിടിയിൽ.

ക്രിമിനൽ കേസുകളിൽ പ്രതികളായ നാട്ടകം മറിയപ്പള്ളി കളപ്പൂർ കെ.പി. ബാബു (അമ്മിണി ബാബു -54), കുമാരനല്ലൂർ പെരുമ്പായിക്കാട് സലിം മൻസിലിൽ എസ്.ബി. ഷംനാസ് (37), വടവാതൂർ പ്ലാമ്മൂട്ടിൽ സാബു കുര്യൻ (ചാച്ച-38), അയ്മനം പൂന്ത്രക്കാവ് പതിമറ്റം കോളനി ജയപ്രകാശ് (മൊട്ട പ്രകാശ് -42) എന്നിവരെയാണ് വെസ്​റ്റ്​ സ്​റ്റേഷൻ ഹൗസ് ഓഫിസർ ഇൻസ്പെക്ടർ എം.ജെ. അരുണി​െൻറ നേതൃത്വത്തിൽ പിടികൂടിയത്. നാലുപേരും കോട്ടയം കെ.എസ്.ആർ.ടി.സി സ്​റ്റാൻഡിലെ ഓട്ടോ തൊഴിലാളികളാണ്.

ഓട്ടോ ഓടിക്കുന്നതി​െൻറ മറവിലാണ് ഇവരുടെ ക്രിമിനൽ പ്രവർത്തനങ്ങൾ.

അസാം സ്വദേശി മാങ്ങാനത്ത് കുടുംബസമേതം വാടകക്ക്​ താമസിക്കുന്ന അലി അക്ബറിനെയാണ് (31) തട്ടിക്കൊണ്ടുപോയി പണം തട്ടിയത്. 12വർഷം മുമ്പ്​ കേരളത്തിൽ എത്തിയ ഇയാൾ ഇൻറർലോക്ക് നിർമാണം നടത്തിയാണ് ജീവിക്കുന്നത്.

വ്യാഴാഴ്ച വൈകീട്ട്​ കോട്ടയം മാർക്കറ്റിൽ പച്ചക്കറി വാങ്ങാൻ എത്തിയ അലിയെ, രണ്ട് ഓട്ടോകളിലായി എത്തിയ സംഘം ബലമായി ഓട്ടോയിൽ വലിച്ചുകയറ്റി. തുടർന്ന് കോട്ടയം ടൗണിലും കോടിമത പുതുപ്പള്ളി ഭാഗങ്ങളിലും കൊണ്ടുനടന്ന് മർദിച്ചു. കോടിമതക്ക്​ സമീപത്തെ ആളൊഴിഞ്ഞ കെട്ടിടത്തിൽ ഇയാളെ ബന്ദിയാക്കിയ​ പ്രതികൾ അലിയുടെ വീട്ടിൽവിളിച്ച് അരലക്ഷംരൂപ മോചനദ്രവ്യം ആവശ്യപ്പെട്ടു.

തുടർന്ന് അലിയുടെ സുഹൃത്ത് 30,000 രൂപ കോടിമത ഭാഗത്തു​െവച്ച് ബാബുവി​െൻറ ​ൈകയിൽ നൽകി. ബാക്കി 20,000 രൂപ വെള്ളിയാഴ്ച ഉച്ചക്ക്​ ഭാരത് ആശുപത്രി ഭാഗത്തുവച്ച് കൈമാറണമെന്ന് ആവശ്യപ്പെട്ട്​ അലിയെ വിട്ടയച്ചു. അലിയുടെ പരാതി പ്രകാരം ജില്ല പൊലീസ് മേധാവി ജി.ജയദേവി​െൻറ നിർദേശാനുസരണം കോട്ടയം ഡിവൈ.എസ്.പി ആർ. ശ്രീകുമാറി​െൻറ നേതൃത്വത്തിൽ അന്വേഷണത്തിനായി പ്രത്യേക സംഘം രൂപവത്​കരിച്ചു.

ഈ സംഘം നടത്തിയ തന്ത്രപരമായ നീക്കത്തിനൊടുവിൽ പണം ഏറ്റുവാങ്ങാൻ എത്തിയ പ്രതികളെ പിടികൂടുകയായിരുന്നു. വെസ്​റ്റ്​ പ്രിൻസിപ്പൽ എസ്.ഐ ടി. ശ്രീജിത്, ജൂനിയർ എസ്.ഐ സുമേഷ്​, പ്രൊബേഷൻ എസ്.ഐ അഖിൽ ദേവ്, ഗ്രേഡ് എസ്.ഐമാരായ കുര്യൻ മാത്യു , കെ.പി മാത്യു , എ.എസ്.ഐമാരായ പി.എൻ മനോജ് , കെ.കെ സന്തോഷ്, സീനിയർ സിവിൽ പൊലീസ് ഓഫിസർ ടി.ജെ സജീവ് , സി.കെ. നവീൻ, സി. സുദീപ് എന്നിവരുടെ നേതൃത്വത്തിലാണ് പ്രതികളെ പിടികൂടിയത്.

ചിങ്ങവനം, ഏറ്റുമാനൂർ, കോട്ടയം ഈസ്​റ്റ്​, വെസ്​റ്റ്​ സ്​റ്റേഷനുകളിൽ അടിപിടി, മോഷണം, പിടിച്ചുപറി, തട്ടിക്കൊണ്ടുപോകൽ എന്നിവ അടക്കം കേസുകളിൽ പ്രതികളാണ് പിടിയിലായവർ.

ഒരുമാസം മുമ്പ്​ കഞ്ഞിക്കുഴിയിൽ ദമ്പതിമാരെ തട്ടിക്കൊണ്ടുപോയി ആക്രമിച്ച് പണംതട്ടിയ കേസിലും ചിങ്ങവനത്ത് സ്ത്രീകൾ മാത്രം താമസിക്കുന്ന സ്ഥലത്ത് ആക്രമണം നടത്തി സ്ത്രീയുടെ കണ്ണ് കുത്തിപ്പൊട്ടിച്ച സംഭവത്തിനുപിന്നിലും ഇതേസംഘമാണ്. തിരുവാർപ്പ് അജി എന്ന മോഷ്​ടാവി​െൻറ മോഷണ മുതൽ വിറ്റുനൽകിയ കേസിലും അമ്മിണി ബാബു പ്രതിയാണ്.