അതിരില്ലാതെ സൗഹൃദം, മനസ്​ നിറച്ച്​ സംഗീതം; തരംഗമായി ‘റിഥം ആൻഡ്​ ട്യൂൺസ്​’

കോട്ടയം: പലനാടുകളിലെ കലാകാരന്മാർ ഒരു കുടക്കീഴിൽ ഒത്തുചേർന്നപ്പോൾ പിറന്നത്​ ഗൃഹാതുരത്വം നിറഞ്ഞ ഒരുപിടി ഓണപ്പാട്ടുകൾ. നാലുവർഷം മുമ്പ്​ തുടങ്ങിയ ‘റിഥം ആൻഡ്​ ട്യൂൺസ്​’ആണ്​ ഒരുപിടി ഓണപ്പാട്ടുകളുടെ ആൽബവുമായി തരംഗമാകുന്നത്​. ഓണനിലാവ് മുതൽ ഓണപ്പുടവ വരെ ഏഴോളം ആൽബങ്ങൾ ഇവർ പുറത്തിറക്കിയിട്ടുണ്ട്​.

2021ലാണ്​ ഈ സൗഹൃദക്കൂട്ടായ്മ ആരംഭിച്ചത്​. മ്യൂസിക്​ ആൽബങ്ങൾക്കായി വരികൾ എഴുതിയിരിക്കുന്നത് ഡോ. ഹേമന്ദ് അരവിന്ദ് ആണ്. സംഗീത സംവിധാനം നിർവഹിച്ചിരിക്കുന്നത്​ കോട്ടയം സ്വദേശിയായ രാജേഷ് മാത്യുവാണ്. ഐ.ടി മേഖലയിൽ പ്രവർത്തിക്കുന്ന രാജേഷ് രാമനും മകൾ ലക്ഷ്മിയുമാണ്​ ഗായകർ. എം.ജി സർവകലാശാലയിലെ ലൈബ്രേറിയനായ എൻ.അനൂപാണ്​ കോർഡിനേഷൻ നിർവഹിക്കുന്നത്​. പെരുമ്പാവൂർ സ്വദേശി ജോൺസൺ പീറ്ററാണ്​ സൗണ്ട്​ എൻജിനീയർ.

ശ്രീകുമാരൻ തമ്പി, ഭാസ്കരൻ മാഷ്​, യേശുദാസ്​ തുടങ്ങിയ സംഗീതലോകത്തെ അതികായന്മാരുടെ ഈണങ്ങളും വരികളുമാണ്​ ഇവർ തമ്മിൽ ബന്ധിപ്പിക്കുന്ന ഘടകം. ദേശങ്ങളുടെ അതിർവരമ്പുകൾ ഭേദിക്കുന്നതാണ്​ ഇവരുടെ കൂട്ടായ്മ. ഒരുതലമുറയുടെ സംഗീതത്തെ കവർസോങുകളായി മാത്രം പരിചയപ്പെട്ട പുതുതലമുറക്ക്​ പഴയ കാലഘട്ടത്തിലെ ഈണങ്ങളു​ടെയും വരികളുടെയും മാന്ത്രികതയെ പരിചയപ്പെടുത്തുകയാണ്​ ഇവർ. ഓണപ്പാട്ടുകൾ കൂടാതെ ക്രിസ്തീയ ഭക്തിഗാനങ്ങളും ആൽബങ്ങളും ഉൾപ്പെടുന്നു. നിരവധി നവാഗത ഗായകരെയും‘റിഥം ആൻഡ്​ ട്യൂൺസ്​’ബാൻഡ്​ സംഗീലോകത്തിലേക്ക്​ കൈപിടിച്ച്​ ഉയർത്തിയിട്ടുണ്ട്​.

സൗഹൃദത്തിലൂടെ സംഗീതലോകത്തിലേക്ക്​

വിവിധമേഖലകളിൽ ജോലിചെയ്യുന്ന ഇവരെ തമ്മിൽ ബന്ധിപ്പിക്കുന്നത്​ ശുദ്ധസംഗീതമാണ്​. എഴുതിയ വരികൾ അയച്ചുകൊടുത്ത്​ അതിന്​ സംഗീതം നൽകുന്നു. ശേഷം ഓർക്കസ്​ട്രയുടെ ട്രാക്കും ആലാപനത്തിന്‍റെ ട്രാക്കും മിക്സ്​ ചെയ്താണ്​ ആൽബം പുറത്തിറക്കുന്നത്​. ഓരോ ​കടമ്പകളും കൂട്ടായ്മയിലൂടെയാണ്​ പൂർത്തിയാക്കുന്നത്​. നാട്ടിൽ ജനിക്കുന്ന വരികൾക്ക്​ ശബ്​ദം പകരുന്നത്​ രണ്ട്​ യു.കെ മലയാളികളും.

ആലപ്പുഴ ചെട്ടിക്കുളങ്ങര സ്വദേശിയായ ഡോ. ഹേമന്ദ്​ അരവിന്ദ്​ ആണ്​ വരികൾ എഴുതിയിരിക്കുന്നത്​. അഗ്രോ ബയോടെക്​ റിസർച്ച്​ സെന്‍ററിലെ ഗവേഷകനും എം.ജി സർവകലാശാലയിലെ മുൻ റിസർച്ച്​ ഗൈഡുമാണ്​ ഇദ്ദേഹം. ​ഇത്തവണ ഓണംആൽബം പുറത്തിറക്കിയത്​ ഏറെ മാനസികവിഷമങ്ങൾ ഉള്ളിലടക്കിയാണ്. ​ ആശുപത്രിക്കിടക്കയിൽ കഴിയുന്ന സ്വന്തം മാതാവിന്​ സമീപമിരുന്നാണ്​ ഹേമന്ദ്​ ‘ഓണപ്പുടവ’ ആൽബത്തിനായി വരികളെഴുതിയത്​. നട്ടെല്ലിലെ ശസ്ത്രക്രിയക്കായി എറണാകുളത്തെ സ്വകാ​ര്യ ആശുപത്രിയിൽ ഹേമന്ദിന്‍റെ മാതാവിനെ പ്രവേശിപ്പിച്ചിരുക്കുകയായിരുന്നു. മാനസികവിഷമങ്ങൾ ഉള്ളിലടക്കി​ പല്ലവി പൂർത്തിയാക്കി, തുടർന്ന്​ അനുപല്ലവിയും.

22 വർഷമായി സംഗീതലോകത്ത്​ സജീവമായ സംക്രാന്തി സ്വദേശി രാജേഷ്​ മാത്യുവാണ്​ വരികൾക്ക്​ സംഗീതം നൽകുന്നത്​. കൂടാതെ പിയാനോ, ഗിത്താർ അധ്യാപകനുമാണ്​. 40ഓളം ശിഷ്യരുണ്ട്​ രാജേഷിന്​ കീഴിൽ. മുമ്പ്​ കോട്ടയത്ത്​ തന്നെ ഒരു പ്രിന്‍റിങ്​ യൂനിറ്റ്​ നടത്തിയിരുന്നു. ​

ലണ്ടൻ മലയാളിയായ രാജേഷ് രാമനും മകൾ ലക്ഷ്മി രാജേഷുമാണ് ആൽബങ്ങളുടെ സ്വരമാധുരിക്ക്​ പിന്നിൽ. എറണാകുളം സ്വദേശിയായ രാജേഷ് രാമൻ നിലവിൽ കുടുംബസമേതം ലണ്ടനിലാണ്​. മകൾ ലക്ഷ്മി പ്ലസ്​ വൺ വിദ്യാർഥിനിയാണ്​. എ.ആർ.റഹ്മാൻ സംഘടിപ്പിച്ച കവർസോങ് മത്സരത്തിലെ വിജയികളിലൊരാളായിരുന്നു ലക്ഷ്മി. 2022ൽ ഫെഫ്ക സംഘടിപ്പിച്ച സംഗീതമത്സരത്തിലും ലക്ഷ്മിയായിരുന്നു ഗ്ലോബൽ ജേതാവ്​. ലണ്ടൻ മലയാളികൾക്കിടയിൽ ഏറെ സുപരിചിതരാണ്​ ഇവർ. പിന്നണിഗായിക കെ.എസ്​.ചിത്രക്കൊപ്പം ലക്ഷ്മി വേദി പങ്കിട്ടുണ്ട്​.