വലയിൽ കുരുങ്ങിയ പ്രാവിനെ ഫയർഫോഴ്സ് സാഹസികമായി രക്ഷപ്പെടുത്തി

കാഞ്ഞിരപ്പള്ളി: വലയിൽ കുരുങ്ങിയ പ്രാവിനെ ഫയർഫോഴ്സ് ഉദ്യോഗസ്ഥർ രക്ഷപ്പെടുത്തി. കാഞ്ഞിരപ്പള്ളി സെൻട്രൽ ജമാഅത്ത് നൈനാർ പള്ളിയുടെ രണ്ടാം നിലയിലുള്ള മിനാരത്തിൽ വലിച്ചുകെട്ടിയിട്ടുള്ള വലയിലാണ് പ്രാവിന്‍റെ കാലുകൾ കുരുങ്ങിയത്.

കാഞ്ഞിരപ്പള്ളി ഫയർഫോഴ്സിൽ വിവരമറിയിച്ചതോടെ ഫയർഫോഴ്സ് ഉദ്യോഗസ്ഥരായ പി. എ. നൗഫൽ പാറയോലിക്കൽ, മഹേഷ്, അനുരാജ്, അനു, ടി. ഗോപി, കൃഷ്ണ പണിക്കർ എന്നിവരെത്തി സാഹസികമായാണ് മിനാരത്തിന് മുകളിൽ കൊടും ചൂടിൽ കയറി പ്രാവിനെ രക്ഷപ്പെടുത്തിയത്.ഫയർസ്റ്റേഷനിൽ കൊണ്ടുവന്ന് പ്രാവിന്‍റെ വിരലുകൾക്കിടയിലുള്ള വലയുടെ കഷണങ്ങൾ മുറിച്ചുമാറ്റി പറത്തി വിട്ടു.