ആ മുറിയും കസേരയും ഇനി വിജനം

ചങ്ങനാശ്ശേരി: പരാതിയുമായെത്തുവർ പറയുന്നതെല്ലാം ശ്രദ്ധയോടെ കേൾക്ക​​ുകയെന്നത്​ സി.എഫ്​. തോമസി​െൻറ പ്രത്യേകതയായിരുന്നു. ഇത്തരം സ്വഭാവസവിശേഷതകളാണ്​ നാല്​ പതിറ്റാണ്ട്​ സി.എഫിനെ ചേർത്തുനിർത്താൻ ചങ്ങനാശ്ശേരിയെ പ്രേരിപ്പിച്ചത്​. ചങ്ങനാശ്ശേരി മെത്രാപ്പോലീത്തൻ പള്ളിയിലെ പ്രഭാത കുര്‍ബാനയില്‍ പങ്കെടുത്താണ് അദ്ദേഹത്തി​െൻറ ദിനചര്യ തുടങ്ങിയിരുന്നത്.

തിരിച്ചു വീട്ടിലെത്തുമ്പോള്‍ പാര്‍ട്ടിക്കാരും അല്ലാത്തവരുമായ നൂറുകണക്കിനാളുകൾ അദ്ദേഹത്തെ കാത്തിരിക്കും. പാര്‍ട്ടി, മണ്ഡലം പരിഗണനയൊന്നുമില്ലാതെ അവരുടെ പ്രശ്നങ്ങൾക്ക് പരിഹാരം കണ്ടെത്തും. രണ്ട് തവണ മന്ത്രിയായും ഒന്‍പത് തവണ ജനപ്രതിനിധിയുമായിരുന്ന വ്യക്തിയാണങ്കിലും ശബ്​ദമുയർത്തി ഉദ്യോഗസ്ഥരോട് സംസാരിക്കുന്നത്​ കണ്ടി​ട്ടേയില്ല. സൗമ്യമായാണ് സംസാരിക്കുക. രാഷ്​ട്രീയ സംഘര്‍ഷങ്ങളുമായി ബന്ധപ്പെട്ട് പൊലീസ് സ്​റ്റേഷനുകളില്‍ ബന്ധപ്പെട്ടാലും മറ്റ് പൊതു പ്രവര്‍ത്തകര്‍ക്കും മാതൃകയാകുന്ന രീതിയിലാണ് അദ്ദേഹം പൊലീസ് ഉദ്യോഗസ്ഥരോടും സംസാരിച്ചിരുന്നത്. കൊച്ചു കുട്ടികള്‍ മുതല്‍ മുതിര്‍ന്നവരോട് വരെ പുഞ്ചിരിയോടു കൂടി അല്ലാതെ സംസാരിക്കുന്ന സി.എഫ് തോമസിനെ കാണുക പ്രയാസമായിരുന്നു.

1980 ല്‍ കേരള കോണ്‍ഗ്രസുകളുടെ പിളര്‍പ്പിനെ തുടര്‍ന്ന്​ കെ.എം. മാണിക്കൊപ്പം സി.എഫ്​.തോമസും ഇടതുപക്ഷത്തേക്ക്​ എത്തുകയായിരുന്നു. ആദ്യമത്സരത്തിൽ യു.ഡി.എഫ് സ്ഥാനാര്‍ഥി കെ.ജെ. ചാക്കോയെ 2633 വോട്ടിനാണ് അദ്ദേഹം തോൽപ്പിച്ചത്​. പിന്നീടിങ്ങോട്ട് തിരിഞ്ഞു നോക്കേണ്ടി വന്നില്ല. 1980 മുതൽ 2016 വരെ മത്സരിച്ച എല്ലാ തെരഞ്ഞെടുപ്പുകളിലും വിജയം അദ്ദേഹത്തിന്​ സ്വന്തം. പാര്‍ശ്വവത്കരിക്കപ്പെട്ട ജനങ്ങളുമായി ഏറെ ഇ​ഴയടുപ്പം അദ്ദേഹം കാട്ടിയിരുന്നു.

ഇത്തരക്കാരുടെ നൂറുകണക്കിന്​ പരാതികൾക്കാണ്​ അദ്ദേഹം പരിഹാരം കണ്ടിരുന്നത്​. ഇനി വീട്ടിലെ സജീവമായ മുറിയില്‍ ഒഴിഞ്ഞ കസേരയും ഒരുപാട് ജനങ്ങളുടെ ഹൃദയ നൊമ്പരങ്ങള്‍ പകര്‍ത്തിയ നിവേദനങ്ങളുടെ കൂമ്പാരവും മാത്രം ബാക്കി.