കണക്​ഷൻ ബോക്സുകളിൽ ഷോർട്ട് സർക്യൂട്ട്; നാലിടത്ത് തീപിടിത്തം

ചങ്ങനാശ്ശേരി: നഗരത്തി​െൻറ വിവിധ ഭാഗങ്ങളിലായി നാലിടത്ത് തീപിടിത്തം. മണിക്കൂറുകൾ ഇടവിട്ടാണ് വ്യാഴാഴ്ച പുലർച്ച മുതൽ ഉച്ചവരെ നാലിടത്ത് തീപിടിത്തം ഉണ്ടായത്. പുലർച്ച അഞ്ചിന് ചങ്ങനാശ്ശേരി റെയിൽവേ ബൈപാസ് ജങ്​ഷനിലെ വൈദ്യുതി പോസ്​റ്റിനു തീപിടിച്ചു. രാവിലെ എട്ടിന് ചങ്ങനാശ്ശേരി പൊലീസ് സ്​റ്റേഷൻ മറ്റം ഭാഗത്ത് റിസ്​വാൻ അപ്പാർട്മെൻറിനു​ സമീപത്തെ വൈദ്യുതി പോസ്​റ്റിലും ഉച്ചക്ക് 12ഓടെ മാർക്കറ്റ് റോഡിൽ വെട്ടിത്തുരുത്ത് ഭാഗത്തും പിന്നീട് പെരുന്ന റോഡിലെ വൈദ്യുതി പോസ്​റ്റിലുമാണ് തീപിടിച്ചത്. നാലിടത്തും ചങ്ങനാശ്ശേരി അഗ്​നിശമന സേന അംഗങ്ങൾ എത്തിയാണ് തീയണച്ചത്. പോസ്​റ്റുകളിലെ കേബിളുകളും മറ്റ് കണക്​ഷൻ കേബിളുകളും പൂർണമായി കത്തിനശിച്ചു.

നാലിടത്തും മറ്റിടങ്ങളിലേക്ക്​ തീപടർന്നുപിടിക്കാതിരുന്നതിനാൽ വലിയ അപകടം ഒഴിവാക്കി. ചങ്ങനാശ്ശേരി അഗ്​നിരക്ഷാസേന ഗ്രേഡ് എസ്.എഫ്.ആർ.ഒ അഭിലാഷ് കുമാർ, എഫ്.ആർ.ഒ ഡ്രൈവർ ബിജു, എഫ്.ആർ.ഒമാരായ ഷുഹൈബ്, ജസ്​റ്റിൻ, സമിൻ, വിവേക് എന്നിവർ തീയണക്കുന്നതിന് നേതൃത്വം നൽകി. കെ.എസ്.ഇ.ബി വൈദ്യുതി പോസ്​റ്റുകളിൽ പുതുതായി സ്ഥാപിച്ച കണക്​ഷൻ ബോക്സുകളിൽ ഷോർട് സർക്യൂട്ട് ഉണ്ടാകുന്നതാകാം തീപിടിത്തത്തിന് ഇടയാക്കുന്നതെന്ന് അഗ്​നിരക്ഷാന സേന ഉദ്യോഗസ്ഥർ പറയുന്നു. മാസങ്ങൾക്ക് മുമ്പും സമാന രീതിയിൽ നഗരത്തി​െൻറ വിവിധ ഭാഗങ്ങളിൽ തീപിടിത്തം ഉണ്ടായിരുന്നു. ഇലക്ട്രിക് പോസ്​റ്റുകളിൽ തുടർച്ചയായി തീപിടിത്തം ഉണ്ടാകുന്നത് നാട്ടുകാരിലും യാത്രക്കാരിലും ആശങ്കയുളവാക്കുന്നുണ്ട്. കത്തിനശിക്കുന്ന ബോക്സുകൾ യഥാസമയം മാറ്റി പുതിയവ സ്ഥാപിക്കുന്നുണ്ടെന്ന്​ ചങ്ങനാശ്ശേരി കെ.എസ്.ഇ.ബി സെക്​ഷൻ എ.ഇ പറഞ്ഞു. ലൂസ് കോൺടാക്ടും ബോക്സുകളിൽ മഴവെള്ളം ഇറങ്ങിയതുമാവാം തീപിടിത്തത്തിന്​ ഇടയാക്കുന്നത്. എല്ലാ ബോക്സുകളും ഒരുപോലെ മാറ്റുക എന്നത് പ്രയാസകരമാണെന്നും എ.ഇ പറഞ്ഞു.