വിദേശമദ്യം പിടികൂടി

ചങ്ങനാശ്ശേരി: ഡ്രൈഡേയില്‍ വില്‍പന നടത്താൻ സൂക്ഷിച്ച എട്ടുലിറ്റര്‍ വിദേശമദ്യം ചങ്ങനാശ്ശേരി പൊലീസും ലഹരിവിരുദ്ധ സ്‌ക്വാഡും ചേര്‍ന്ന് പിടികൂടി. ചങ്ങനാശ്ശേരിയിൽ ലോട്ടറി വില്‍പന നടത്തുന്ന തിരുവനന്തപുരം നാറാണി സ്വദേശി ജെ.ജെ ഭവനില്‍ ജസ്റ്റിന്‍ ജോസാണ് (52) അറസ്റ്റിലായത്.

ബിവറേജില്‍നിന്ന് മദ്യംവാങ്ങി സൂക്ഷിച്ചശേഷം കൂടുതല്‍ വിലക്ക് വിൽപന നടത്തുകയായിരുന്നു. മാര്‍ക്കറ്റില്‍ വരുന്നവര്‍ക്കായി പുലര്‍ച്ച മൂന്നുമുതല്‍ വിൽപന തുടങ്ങുകയാണ് പതിവെന്നും പൊലീസ് പറഞ്ഞു. രഹസ്യവിവരം ലഭിച്ചതിന്റെ അടിസ്ഥാനത്തില്‍ വെള്ളിയാഴ്ച പുലർച്ച മാര്‍ക്കറ്റിനുള്ളില്‍ വേഷംമാറിയെത്തിയാണ് പൊലീസ് ഇയാളെ പിടികൂടിയത്.