അരുണി​െൻറ വേർപാട്​​ തിരുവോണ സദ്യക്ക് ഇലയുമായി പോകുമ്പോൾ

എലിക്കുളം: കൂട്ടുകാർക്കൊപ്പം ഓണസദ്യയുണ്ണാൻ വാഴയിലയുമായി ബൈക്കിൽ പോകുമ്പോഴായിരുന്നു അരുണി​െൻറ ജീവൻ പൊലിഞ്ഞത്.

തിരുവോണദിനത്തിൽ പാലാ-പൊൻകുന്നം റോഡിൽ ഏഴാംമൈലിൽ ബൈക്ക് സോളാർ വഴിവിളക്കി​െൻറ തൂണിൽ ഇടിച്ചാണ്​ ഉരുളികുന്നം മാളിയേക്കൽ ശശിധരൻ നായരുടെ മകൻ അരുൺദേവ് (28) മരിച്ചത്.

അപകടത്തിൽ വഴിയിൽ ചിതറിയ വാഴയിലകൾ നാടിന്​ നൊമ്പരക്കാഴ്ചയായി. ഏഴാംമൈലിൽ കൂട്ടുകാർ നടത്തുന്ന ഹോട്ടലിൽ ഒരുമിച്ചിരുന്ന് സദ്യയുണ്ണുന്നതിന് ഇലയുമായി പോകുകയായിരുന്നു അരുൺദേവ്.

സ്വകാര്യ ബസ് കണ്ടക്ടറായിരുന്ന അരുൺ ബസ് സർവിസ് ഇല്ലാത്തതിനാൽ കൂട്ടുകാരുടെ ഹോട്ടലിൽ സഹായിയായി നിൽക്കുകയായിരുന്നു. പുതിയ വീടി​െൻറ നിർമാണം പൂർത്തിയാക്കുന്ന തിരക്കിലുമായിരുന്നു.

അച്ഛനും അമ്മക്കുമൊപ്പം അടുത്തയാഴ്ച പുതിയ വീട്ടിലേക്ക് മാറിത്താമസിക്കാനിരിക്കെയാണ് ദുരന്തം ജീവനെടുത്തത്. തിങ്കളാഴ്ച ഉച്ചക്ക്​ ഒരുമണിക്കായിരുന്നു അപകടം.