66 പാടങ്ങൾ കൊയ്യാനായില്ല; നെല്ല്​ സംഭരണത്തിൽ ഇടിവ്​

blurb വേനൽമഴ കനത്ത നാശംവിതച്ചതാണ് നെല്ലിന്‍റെ അളവിനെ ബാധിച്ചത്​ കോട്ടയം: ജില്ലയിൽ നെല്ല്​ സംഭരണത്തിൽ ഇടിവ്​. കഴിഞ്ഞ വർഷത്തെ അ​​പേക്ഷിച്ച്​ 10,000ത്തോളം ടൺ നെല്ലിന്‍റെ കുറവാണ്​ ഇത്തവണ ഉണ്ടായത്​. വേനൽമഴ കനത്ത നാശംവിതച്ചതാണ്​ നെല്ലിന്‍റെ അളവിനെ ബാധിച്ചതെന്ന്​ സ​പ്ലൈകോ പറയുന്നു. സംഭരണത്തിനായി രജിസ്റ്റർ ചെയ്ത പാടശേഖരങ്ങളിൽ 66 പാടങ്ങൾ കൊയ്യാൻ കഴിഞ്ഞില്ല. മഴയിൽ വെള്ളം കയറിയ ഈ പാടശേഖരങ്ങളിലെ നെല്ല്​ പൂർണമായി നശിച്ചിരുന്നു. സപ്ലൈകോയു​ടെ കണക്കെടുപ്പിൽ​ 720 ഹെക്ടറി​ലെ കൃഷിയാണ്​ കൊയ്​തെടുക്കാൻ കഴിയാതെ നശിച്ചത്​. മഴമൂലം ഭാഗികമായി ചില പാടശേഖരങ്ങളിലെ വിളവും നശിച്ചിരുന്നു. ചങ്ങനാശ്ശേരി താലൂക്കിലാണ്​ മഴ കൂടുതൽ പ്രശ്നങ്ങൾ സൃഷ്ടിച്ചത്​. നെല്ല്​ പൂർണമായും നശിച്ച പാടശേഖരങ്ങൾ കൂടുതൽ ഈ മേഖലയിലാണ്​. ​ ജില്ലയിലെ വിവിധ പാടശേഖരങ്ങളിൽനിന്നായി ഇതുവരെ 46,680 ടൺ നെല്ലാണ്​ സംഭരിച്ചത്​. കഴിഞ്ഞ തവണ രണ്ടുകൃഷിയിൽനിന്നുമായി 73,139 ടൺ നെല്ലാണ്​ സംഭരിച്ചത്​. എന്നാൽ, ഇത്തവണ ഇതുവരെ 64,278 ടൺ നെല്ല്​ മാത്രമാണ്​ മില്ലുകൾ സംഭരിച്ചത്​. ജില്ലയിൽ ഏറ്റവും കൂടുതൽ നെല്ല്​ സംഭരിച്ചത്​ തിരുവാർപ്പ്​ ജെ ബ്ലോക്ക്​ പാടശേഖരത്തിൽനിന്നാണ്​. 2900 ടണ്ണാണ്​ ഇവിടത്തെ മാത്രം സംഭരണം. തിരുവാർപ്പ്​ പഞ്ചായത്തിലാണ്​ ഏറ്റവും കൂടുതൽ നെല്ല്​ സംഭരിച്ചത്​. ജില്ലയിൽ സംഭരണം പൂർത്തിയായി. നെല്ല്​ നൽകിയ കർഷകരിൽ ചിലർ രജിസ്​ട്രേഷൻ നടത്തിയിരുന്നില്ല. ഇവർക്ക്​ രജിസ്​ട്രേഷൻ ചെയ്യാൻ അനുവദിച്ച സമയപരിധിയും ബുധനാഴ്ച പൂർത്തിയായി. കഴിഞ്ഞ കുറേ വർഷങ്ങളായി നെല്ല്​ ഉൽപാദനം വർധിക്കുകയായിരുന്നു പതിവ്​. എന്നാൽ, മഴ നാശംവിതച്ചതിനാൽ ഇത്തവണ കുറഞ്ഞു. കുമരകം, തിരുവാർപ്പ്, ആർപ്പൂക്കര, വെച്ചൂർ, തലയാഴം, പായിപ്പാട്, നാട്ടകം, കല്ലറ എന്നിവിടങ്ങളിൽനിന്നാണ്​ കൂടുതലായി സംഭരണം നടന്നത്​. കാലാവസ്ഥ പ്രതികൂലമായതിനെ തുടർന്ന് ഇത്തവണ വിവിധ സമയങ്ങളിലായായിരുന്നു കർഷകർ വിതയിറക്കിയത്​. ഇതുമൂലമാണ്​ വിളവെടുപ്പ്​ വൈകിയത്​. ജില്ലയിൽനിന്ന് 18 മില്ലുകളാണ് നെല്ല് സംഭരിച്ചത്​. അവസാനഘട്ടങ്ങളിൽ മില്ലുകൾ നെല്ല്​ സംഭരിക്കാൻ മടിച്ചത്​ കർഷക പ്രതിഷേധത്തിന്​ ഇടയാക്കി. മഴയിൽ നെല്ല്​ നശിക്കാൻ ഇത്​ കാരണമായി. ചില പാടശേഖരങ്ങളിൽ ആഴ്ചകളോളം നെല്ല്​ കൂട്ടിയിട്ടിരിക്കുകയായിരുന്നു. 12,374.512 ഹെക്ടറിലാണ് ജില്ലയിൽ പുഞ്ചകൃഷി നടന്നത്​. അത്യുൽപാദനശേഷിയുള്ള വിത്തിനമായ ഉമയാണ് പ്രധാനമായും കൃഷി ചെയ്​തിരുന്നത്​. കൂടാതെ കുറഞ്ഞ അളവിൽ ജ്യോതിയും കൃഷി ചെയ്​തിരുന്നു. നിലം ഒരുക്കൽ, ഞാറുനടീൽ തുടങ്ങിയ പ്രവർത്തനങ്ങളിൽ തൊഴിലുറപ്പ് തൊഴിലാളികളും സജീവമായിരുന്നു. p2 lead