37 വർഷം മുമ്പ് മകൾ കാറിടിച്ച്​ മരിച്ച സ്ഥലത്ത് ലോഡ്ജ് ഉടമയുടെ ജീവനെടുത്ത്​ ബസ്​ അപകടം

കോട്ടയം: സ്കൂട്ടറില്‍ കെ.എസ്​.ആർ.ടി.സി സൂപ്പർ ഫാസ്റ്റ്​ ബസിടിച്ച്​ ജോയ്‌സ് ടൂറിസ്റ്റ് ഹോം ഉടമ മരിച്ചത്​ 37 വർഷം മുമ്പ് മകളുടെ ജീവനെടുത്ത അതേ അപകടസ്ഥലത്ത്. കോട്ടയം തെള്ളകം ഹോളി ക്രോസ് സ്‌കൂളിന്​ സമീപം മ്യാലിയിൽ എം.കെ. ജോസഫാണ് (റിട്ട. സർവേ സൂപ്രണ്ട്​ -78) മരിച്ചത്​. വ്യാഴാഴ്ച രാത്രി പത്തിന്​ തെള്ളകം കുരിശ് കവലയിലായിരുന്നു അപകടം. 1985ലാണ്​ ജോസഫിന്‍റെ മകൾ അഞ്ചുവയസ്സുകാരി ജോയ്​സ്​ കാറിടിച്ച്​ മരിച്ചത്​. കുരിശുപള്ളിയിൽ മേയ്​മാസ വണക്ക പ്രാർഥനക്ക്​ എത്തിയപ്പോൾ റോഡരികിൽ നിയന്ത്രണംവിട്ട കാർ ഇടിക്കുകയായിരുന്നു. ഇതേ സ്ഥലത്ത്​ വീണ്ടും അപകടരൂപത്തിൽ വിധി പിതാവിനെയും തട്ടിയെടുത്തു. മകളുടെ പേരിൽ ജോസഫ്​ ടൂറിസ്റ്റ് ഹോം ​നടത്തിയിരുന്നു. കാരിത്താസ്​ ജങ്​ഷനിലെ ഈ ലോഡ്​ജിലേക്ക്​ പോകുന്നതിനിടെയായിരുന്നു അപകടം. റൂമെടുക്കാൻ വന്നവർക്ക് താക്കോൽ നൽകാനാണ്​ ജോസഫ്​ വീട്ടിൽനിന്ന്​ ലോഡ്ജിലേക്ക് പുറപ്പെട്ടത്​. ഇതിനിടെ തൃശൂരിൽനിന്ന്​ പത്തനാപുരത്തേക്ക്​ പോകുകയായിരുന്ന സൂപ്പർ ഫാസ്റ്റ് ബസ് ഇദ്ദേഹം സഞ്ചരിച്ചിരുന്ന സ്കൂട്ടറിൽ ഇടിക്കുകയായിരുന്നു. ബസ്​ മറ്റൊരു വാഹനത്തെ മറികടക്കുന്നതിനിടെയാണ്​ അപകടം. കെ.എസ്.ആർ.ടി.സി ബസിന്‍റെ അമിതവേഗമാണ്​ അപകടകാരണമെന്ന്​ ഏറ്റുമാനൂർ പൊലീസ്​ പറഞ്ഞു. ബസ് പൊലീസ് കസ്റ്റഡിയിലെടുത്തു. ജോസഫിന്‍റെ മൃതദേഹം കോട്ടയം മെഡിക്കൽ കോളജ് ആശുപത്രിയിൽ പോസ്റ്റ് മോർട്ടത്തിനുശേഷം കാരിത്താസ് ആശുപത്രി മോർച്ചറിയിലേക്ക് മാറ്റി. ഭാര്യ: ത്രേസ്യാമ്മ (റിട്ട. ഹെഡ് നഴ്‌സ്, കോട്ടയം മെഡിക്കൽ കോളജ്). മറ്റുമക്കൾ: ജയ്‌സൺ (ബംഗളൂരു), ജയ്‌സ് (യു.എസ്). മരുമക്കൾ: രശ്മി, ജോ. സംസ്‌കാരം ചൊവ്വാഴ്ച വൈകീട്ട്​ മൂന്നിന് സംക്രാന്തി ലിറ്റിൽ ഫ്ലവർ ക്‌നാനായ പള്ളി സെമിത്തേരിയിൽ. വെള്ളിയാഴ്ച ഇതേ സ്ഥലത്ത്​​ വീണ്ടും അപകടം നടന്നു. ഇതിൽ രണ്ടുപേർക്ക്​ പരിക്കേറ്റു. പടം ജോസഫ്​ KTD A.K.JOSEPH 78 KTM പടം KTG JOSEPH ACCIDENT 1 KTG JOSEPH ACCIDENT 2 കെ.എസ്.ആർ.ടി.സി സൂപ്പർ ഫാസ്റ്റ് ബസ്​ സ്കൂട്ടറിൽ ഇടിച്ചുണ്ടായ അപകടം