ഹിറ്റാണ്​ ഈ പത്തുരൂപ പച്ചക്കറി

കോട്ടയം: കളത്തിപ്പടി മരിയൻ സ്​കൂളിന്​ സമീപം സ്നേഹക്കൂട് ആരംഭിച്ച പത്തുരൂപ പച്ചക്കറികട ദിവസങ്ങൾക്കകം ഹിറ്റായി. പത്തുരൂപയുടെ പച്ചക്കറി പാ​ക്കറ്റുകളായാണ് കടയിൽ വിൽപനക്ക്​ ​െവച്ചിരിക്കുന്നത്​. ആവശ്യമുള്ള പച്ചക്കറി പായ്​ക്കറ്റ്​ എടുത്ത്​ പണം നൽകി പെ​ട്ടെന്ന്​ മടങ്ങാം. തൂക്കാനും മുറിക്കാനും നിക്കണ്ട.

കോവിഡ്​ കാലത്ത്​ കടയിലെ തിരക്കിൽ കൂടിനിൽക്കുന്നതിനെക്കുറിച്ചുള്ള ആശങ്കയും വേണ്ട. വീട്ടിലേക്കുള്ള പച്ചക്കറി വാങ്ങുന്നതിനൊപ്പം സ്നേഹക്കൂടിനൊപ്പം കാരുണ്യ പ്രവർത്തനത്തിൽ പങ്കാളിയാകാൻ കഴിഞ്ഞെന്ന സന്തോഷത്തോടെ ​മടങ്ങുകയും ചെയ്യാം.

സ്നേഹക്കൂട് അഗതിമന്ദിരത്തി​െൻറ നേതൃത്വത്തിൽ ചിങ്ങം ഒന്നിനാണ്​ കട തുടങ്ങിയത്​. കടയിൽനിന്നുള്ള വരുമാനം സ്നേഹക്കൂട് അഗതിമന്ദിരത്തിലെ അമ്മമാർക്ക്​ ഭക്ഷണവും മരുന്നും നൽകാനാണ്​ ഉപയോഗിക്കുന്നത്​.

എല്ലാ ഇനങ്ങൾക്കും പത്തുരൂപയാണ്​ വില. മാർക്കറ്റുകളിൽനിന്നും കർഷകരിൽനിന്നും ശേഖരിക്കുന്ന പച്ചക്കറികൾ കഴുകി വൃത്തിയാക്കിയാണ്​ പായ്​ക്ക്​ ചെയ്യുന്നത്​. കളത്തിപ്പടിയിൽ സ്നേഹക്കൂട് നേരത്തേ തുടങ്ങിയ കഞ്ഞിക്കടയും കോടിമതയിലെ ഭക്ഷണശാലയും രുചിപ്രിയരുടെ ഇഷ്​ടകേന്ദ്രങ്ങളാണ്​.