ഇളങ്കാട് ടൗൺ പാലം നിർമാണം: 68 ലക്ഷം അനുവദിച്ചു

മുണ്ടക്കയം: കഴിഞ്ഞ പ്രളയത്തിൽ തകരാറിലായ ഇളങ്കാട് ടൗൺ ഭാഗത്ത് വല്യേന്ത തോടിന് കുറുകെയുള്ള കൂട്ടിക്കൽ - ഇളങ്കാട് റോഡിലെ ഇളങ്കാട് ടൗൺ പാലം നിലവിലുള്ള ചെറിയ പാലത്തിനുപകരം പുതിയത്​ നിർമിക്കുന്നതിന് 68 ലക്ഷം രൂപ അനുവദിച്ചതായി എം.എൽ.എ അഡ്വ. സെബാസ്റ്റ്യൻ കുളത്തുങ്കൽ അറിയിച്ചു. നിലവിലുണ്ടായിരുന്ന ആറുമീറ്റർ നീളത്തിലുള്ള പഴയപാലത്തിന് പകരം 10.90 മീറ്റർ നീളവും 7.60 മീറ്റർ വീതിയുള്ളതും ഒരുവശത്തുകൂടി കാൽനടക്കാർക്കായി ഫുട്പാത്തും ഉൾപ്പെടെയാണ് പുതിയപാലം നിർമിക്കുക. അധികജലം വന്നാലും പാലത്തിന്​ മുകളിലൂടെ കയറി ഒഴുകിപ്പോകാവുന്നവിധം ആധുനിക സാങ്കേതികവിദ്യ ഉപയോഗിച്ച് സബ്മേഴ്‌സ്യബിൾ പാലമാണ് നിർമിക്കുക എന്നും എം.എൽ.എ അറിയിച്ചു. പാലം തകർന്നതോടെ യാത്രക്ലേശം രൂക്ഷമായി ജനങ്ങൾ ഏറെ ദുരിതം അനുഭവിച്ചിരുന്നു. ടെൻഡർ നടപടി പൂർത്തീകരിച്ച് പരമാവധി വേഗത്തിൽ പാലം നിർമാണം നടപ്പിലാക്കുമെന്നും എം.എൽ.എ കൂട്ടിച്ചേർത്തു.