എം.ജി സർവകലാശാല പിരിച്ചുവിട്ട അധ്യാപകരെ തിരിച്ചെടുക്കൽ: കോടതി വിധി 300 പേർക്ക്​ ബാധകമാകും

കോട്ടയം: എം.ജി സർവകലാശാലക്കു കീഴിലുള്ള സ്വാശ്രയസ്ഥാപനങ്ങളിൽനിന്ന്​ പിരിച്ചുവിട്ട അധ്യാപകരെ തിരിച്ചെടുക്കണമെന്ന സുപ്രീംകോടതി വിധി 300 അധ്യാപക-അനധ്യാപക ജീവനക്കാർക്ക്​ ബാധകമാകും. പിരിച്ചുവിട്ട തീയതി മുതൽ മുഴുവൻ വേതനവും നൽകി തിരിച്ചെടുക്കണമെന്നും നാലു മാസത്തിനകം പുനർനിയമനം നടത്തി വിവരം അറിയിക്കണമെന്നുമാണ്​ കോടതി ഉത്തരവ്​. പിരിച്ചുവിട്ടശേഷം വിരമിച്ചവർക്ക്​ മുഴുവൻ പെൻഷൻ ആനുകൂല്യങ്ങളും നൽകണമെന്നും ഉത്തരവിലുണ്ട്​. സർവകലാശാലയുടെ സ്വാശ്രയസ്ഥാപനങ്ങളിൽ നിയമനം ലഭിച്ച അധ്യാപകരെ 2017ലാണ്​ സെന്‍റര്‍ ഫോര്‍ പ്രഫഷനല്‍ ആന്‍ഡ് അഡ്വാന്‍സ്ഡ് സ്റ്റഡീസ് (സീപാസ്) സൊസൈറ്റിക്ക്​ കീഴിലേക്ക്​ മാറ്റിയത്​. സ്ഥിരം, കരാർ, ഗെസ്റ്റ്​ എന്നിങ്ങനെ മൂന്നുതരം ജീവനക്കാരാണ്​ അന്നുണ്ടായിരുന്നത്​. 2009ൽ കരാർ ജീവനക്കാരിലൊരാൾ കോടതിയിൽ പോയി സ്ഥിര നിയമനം നേടിയതിനെ തുടർന്ന്​ മറ്റ്​ 95​ കരാർ ജീവനക്കാരും കോടതിയെ സമീപിച്ച്​ 2017ൽ അനുകൂല വിധി നേടി. ഈ വിധി വന്ന സമയത്താണ്​ ആരോഗ്യസർവകലാശാലക്ക്​ മാത്രമേ മെഡിക്കൽ അനുബന്ധകോഴ്​സുകൾ നടത്താവൂ എന്ന വ്യവസ്ഥ വന്നത്​​. ഇതോടെ എം.ജി സർവകലാശാല സ്വാശ്രയകോഴ്​സുകൾ നിർത്താൻ തീരുമാനിച്ചു. ഇതിനെതിരെ ജീവനക്കാർ പ്രതിഷേധം നടത്തി. വിഷയത്തിലിടപെട്ട സർക്കാർ സൊസൈറ്റി രൂപവത്​കരിച്ച്​ സ്ഥാപനങ്ങളെ അതിനുകീഴിലേക്ക്​ മാറ്റാൻ നിർദേശിച്ചു. അതുപ്രകാരം സീപാസ്​ രൂപവത്​കരിച്ച്​ സ്ഥാപനങ്ങളെയും അധ്യാപകരെയും ആസ്തിയടക്കം മാറ്റി. കേരളത്തിൽ പൊതുമേഖലയിൽ ആരംഭിച്ച ആദ്യ​ സ്വാശ്രയ സ്ഥപനങ്ങളടക്കമാണ്​ ഇത്തരത്തിൽ കൈവിട്ടത്​. ഇതോടെ സർവകലാശാല ജീവനക്കാരായിരുന്നവർ സൊസെറ്റിക്ക്​ കീഴിലായി. വേതനത്തിലും ഇടിവുവന്നു. സർവകലാശാല ജീവനക്കാരായാണ്​ തങ്ങൾക്ക്​ നിയമനം നൽകിയതെന്ന കാര്യം ചൂണ്ടിക്കാട്ടി ചില അധ്യാപകർ സീപാസിൽ ചുമതലയേൽക്കാൻ തയാറായില്ല. ഇതോടെ​ സർവകലാശാല നടപടിക്കെതിരെ അധ്യാപകർ കോടതിയെ സമീപിക്കുകയായിരുന്നു​. തുടർന്ന്​ അധ്യാപകർക്ക്​ അനുകൂലമായി ഹൈകോടതി ഡിവിഷൻ ബെഞ്ച്​ വിധി പുറപ്പെടുവിച്ചു. ഇതിനെതിരെ​ സർവകലാശാല നൽകിയ ഹരജിയിലാണ്​ ഇപ്പോൾ സുപ്രീംകോടതിയുടെ അന്തിമവിധി വന്നത്​. കോട്ടയം, ഇടുക്കി, പത്തനംതിട്ട, എറണാകുളം, ആലപ്പുഴ എന്നിങ്ങനെ അഞ്ചു ജില്ലകളിലായി 42 സ്ഥാപനങ്ങളും 750 ജീവനക്കാരുമാണ്​ സീപാസിന്​ ഇപ്പോഴുള്ളത്​. കോടതിവിധി പഠിച്ച്​ നിയമവശം പരിശോധിക്കുകയാണ്​ സീപാസ്​ അധികൃതരും സർവകലാശാലയും സെൽഫ്​ ഫിനാൻസിങ്​ കോളജ്​ ടീച്ചേഴ്​സ്​ ആൻഡ്​ സ്റ്റാഫ്​ അസോസിയേഷനും (എസ്​.എഫ്​.സി. ടി.എസ്​.എ). കോടതിവിധി അനുസരിച്ച്​ അധ്യാപകരെ തിരിച്ചെടുക്കണമെന്നാണ്​​ തങ്ങളുടെ ആവശ്യമെന്ന്​ ​ അസോസിയേഷൻ ഭാരവാഹികൾ അറിയിച്ചു. സർവകലാശാലയുടെ​ ആസ്തി തിരിച്ചുപിടിക്കണം കോട്ടയം: അഞ്ചു ജില്ലകളിലായി സർവകലാശാല സീപാസിനു കൈമാറിയ ആസ്തികൾ തിരിച്ചുപിടിക്കണമെന്ന്​ ഫെഡറേഷൻ ഓഫ് ഓൾ കേരള യൂനിവേഴ്സിറ്റി എംപ്ലോയീസ് ഓർഗനൈസേഷൻ ജനറൽ സെക്രട്ടറി എൻ. മഹേഷ് ആവശ്യപ്പെട്ടു. സർവകലാശാല സ്വന്തമായി വാങ്ങിയ സ്ഥലങ്ങളും കെട്ടിടങ്ങളും അടക്കമാണ് പ്രതിവർഷം 10 ലക്ഷം രൂപ നൽകണമെന്ന വ്യവസ്ഥയിൽ സീപാസിന്​ വാടകക്ക്​​ നൽകിയത്​. തിരിച്ചെടുക്കുന്ന അധ്യാപകർക്കു നൽകാനുള്ള തുകയും സർവകലാശാല നൽകണം. നിലവിൽ ആസ്തികൾ മുഴുവനും സീപാസിനും ബാധ്യതകൾ സർവകലാശാലക്കും എന്നതാണ്​ സ്ഥിതി. ആഭ്യന്തരവരുമാനം വർധിപ്പിക്കാൻ സർവകലാശാല ഒന്നും ചെയ്യുന്നില്ല. സർവകലാശാല ആസ്തികൾ വീണ്ടെടുക്കാനുള്ള പ്രക്ഷോഭങ്ങൾക്കു മുന്നിട്ടിറങ്ങുമെന്നും ജനറൽ സെക്രട്ടറി പറഞ്ഞു.