പൊതുവിദ്യാലയങ്ങളിലേക്ക്​ ഒഴുക്ക്​; സ്വകാര്യ മേഖലയെ കൈവിട്ട്​ 20,038 വിദ്യാർഥികൾ

കോട്ടയം: ക്ലാസ്​മുറികൾ നിശ്ശബ്​ദമാണെങ്കിലും പൊതുവിദ്യാലയങ്ങളിലേക്ക്​ വിദ്യാർഥികളുടെ ഒഴുക്ക്​. ഒന്നുമുതൽ പത്തുവരെയുള്ള ക്ലാസുകളിലായി ഇത്തവണ ഗവ, എയ്​ഡഡ്​ സ്​കൂളുകളിലേക്ക്​ പുതുതായി എത്തിയത്​ 30,083 വിദ്യാർഥികൾ. മുൻവർഷത്തെ അപേക്ഷിച്ച്​ രണ്ടുമുതൽ 10വരെയുള്ള ക്ലാസുകളിലേക്കുള്ള കുട്ടികളുടെ എണ്ണം റെക്കോഡിലെത്തി. 20,038 വിദ്യാർഥികളാണ്​ സ്വകാര്യ വിദ്യാലയങ്ങളെ കൈവിട്ട്​ പൊതുവിദ്യാഭ്യാസത്തി​ൻെറ ഭാഗമായത്​. കഴിഞ്ഞവർഷം രണ്ടുമുതൽ 10വരെയുള്ള ക്ലാസുകളിലായി പുതിയതായി എത്തിയത്​ 7054 കുട്ടികളായിരുന്നു. ഇതാണ്​ ഇത്തവണ 20,000 കടന്നത്​. കഴിഞ്ഞദിവസം വരെയുള്ള കണക്കനുസരിച്ച്​ ജില്ലയിൽ 10,045 വിദ്യാർഥികളാണ്​ ഒന്നാംക്ലാസിലേക്ക്​ പ്രവേശനം നേടിയിരിക്കുന്നത്​. സ്​കൂൾ തുറക്കുന്നതോ​െട ഇത്​ ഉയരാൻ സാധ്യതയുണ്ടെന്നും വിദ്യാഭ്യാസവകുപ്പ്​ വ്യക്തമാക്കുന്നു. കോവിഡ്​ സൃഷ്​ടിച്ച സാമ്പത്തിക പ്രതിസന്ധിയാണ്​ കുടുംബങ്ങൾ കൂട്ടമായി സ്വകാര്യ സ്​കൂളുകളെ കൈവിടാൻ കാരണമെന്നാണ്​​ സൂചന. പൊതുവിദ്യാലയങ്ങളിൽ പാഠപുസ്​തകമടക്കം സൗജന്യമാണ്​. എന്നാൽ, സി.ബി.എസ്​.ഇ സ്​കൂളുകളിലെ പ്രൈമറി വിദ്യാർഥികളിൽനിന്ന്​ പാഠപുസ്​തകത്തിനും നോട്ടുബുക്കുകൾക്കുമായി 2500 മുതൽ 4000 രൂപവരെയാണ്​ ഈടാക്കുന്നത്​. കോവിഡ്​ കണക്കി​ലടുത്ത്​ ഫീസ്​ പിരിക്കരുതെന്ന്​ മുഖ്യമ​ന്ത്രിയടക്കം അഭ്യർഥിച്ചിരുന്നെങ്കിലും പലയിടങ്ങളിലും പണം ഈടാക്കുന്നതായി പരാതിയുണ്ട്​. പുസ്​തക വിലയും പല സ്​കൂളുകളിലും കുത്തനെ ഉയർത്തിയിട്ടുണ്ട്​. ഇത്തരം സാമ്പത്തിക പ്രതിസന്ധികൾക്കൊപ്പം സർക്കാർ സ്​കൂളുകളുടെ ഭൗതിക സാഹചര്യം മെച്ചപ്പെട്ടതും രക്ഷിതാക്കളെ ആകർഷിച്ചു. ഒന്നാം ക്ലാസിനുപുറമേ, അഞ്ച്​, എട്ട്​ ക്ലാസുകളിലേക്കാണ്​ കൂടുതൽ വിദ്യാർഥികൾ സർക്കാർ, എയ്​ഡഡ്​ സ്​കൂളുകളിലേക്ക്​ എത്തിയത്​. വിവിധ വിദ്യാഭ്യാസ ജില്ലകളിലായി കാഞ്ഞിരപ്പള്ളിയിലാണ്​ ഏറ്റവും കൂടുതൽപേർ ​പൊതുവിദ്യാലയങ്ങളിലേക്ക്​ എത്തിയത്​ -4160 വിദ്യാർഥികൾ. കോട്ടയം ഈസ്​റ്റ്​- 2599, വെസ്​റ്റ്​- 2236, പാമ്പാടി- 1228, കൊഴുവനാൽ- 594, ചങ്ങനാശ്ശേരി- 3487, ഈരാറ്റുപേട്ട- 2262, കറുകച്ചാൽ- 2151, പാലാ- 1836, രാമപുരം- 1530, ഏറ്റുമാനൂർ- 2224, കുറവിലങ്ങാട്​- 3108, വൈക്കം- 2668 എന്നിങ്ങനെയാണ്​ മറ്റ്​ സബ്​ ജില്ലകളിലെ കണക്ക്​. പൊതുവിദ്യാഭ്യാസ സംരക്ഷണ യജ്ഞത്തി​ൻെറ ഭാഗമായി ജില്ലയിലെ സ്​കൂളുകളിലെ ക്ലാസ്​മുറികൾ ഹൈടെക്കാക്കിയിരുന്നു. അഞ്ചുകോടി, മൂന്നുകോടി, ഒരുകോടി രൂപ എന്നിങ്ങനെ വിവിധ പദ്ധതികളിലായി ജില്ലയിൽ 42 ഗവ. സ്​കൂളുകളിൽ അന്താരാഷ്​ട്ര നിലവാരത്തിലേക്ക്​ ഉയർത്തിയിരുന്നു. അക്കാദമിക്​ നിലവാരം ഉയർത്താനും വിവിധ പദ്ധതികൾ നടപ്പിലാക്കിയിരുന്നു. എസ്​.എസ്​.എൽ.സി പരീക്ഷയിലടക്കമുള്ള ഉയർന്ന വിജയശതമാനവും പലരെയും സർക്കാർ മേഖലയിലേക്ക്​ ആകർഷിച്ചു. പൊതുവിദ്യാഭ്യാസ സംരക്ഷണ യജ്ഞത്തി​ൻെറ ഭാഗമായി കൂടുതൽ പദ്ധതികൾ ഈ വർഷവും ഉണ്ടാകുമെന്ന് വിദ്യാഭ്യാസ ഉപഡയറക്ടർ വി.ആർ. ഷൈല, പൊതുവിദ്യാഭ്യാസ സംരക്ഷണ യജ്ഞം ജില്ല കോഡിനേറ്റർ കെ.ജെ. പ്രസാദ്, മാണി ജോസഫ് , കൈറ്റ് ജില്ല കോഒാഡിനേറ്റർ കെ.ബി. ജയശങ്കർ, ഡയറ്റ് പ്രിൻസിപ്പൽ രാമചന്ദ്രൻ നായർ എന്നിവർ പറഞ്ഞു.