കേരളത്തിന്‍റെ കടലാസ്​ ഉടൻ: ഉദ്​ഘാടനം 19ന്​

കോട്ടയം: സംസ്ഥാന സർക്കാർ ഏറ്റെടുത്ത കേരള പേപ്പർ പ്രോഡ​ക്ട്​ ലിമിറ്റഡിൽ (കെ.പി.പി.എൽ-പഴയ എച്ച്​.എൻ.എൽ) ന്യൂസ്​ പ്രിന്‍റ്​ ഉൽപാദനത്തിന്‍റെ ഉദ്​ഘാടനം 19ന്​ രാവി​ലെ 11ന്​ മുഖ്യമന്ത്രി പിണറായി വിജയൻ നിർവഹിക്കും. പവർബോയ്​ലറിന്‍റെ അറ്റകുറ്റപ്പണി പൂർത്തിയാക്കിയ ശേഷം കഴിഞ്ഞ ദിവസം ട്രയൽ റൺ നടത്തിയിരുന്നു. എന്നാൽ, പേപ്പർ മെഷീനിലേക്ക്​ പൾപ്പ്​ എടുക്കുന്ന സമയത്ത്​ പേപ്പർ മെഷീന്‍റെ വാക്വം പമ്പ്​ ​കത്തിപ്പോയതിനാൽ ട്രയൽ റൺ പൂർത്തിയാക്കാനായില്ല. വാക്വം പമ്പ്​ പുതിയത്​ ഘടിപ്പിച്ച്​ ഉദ്​ഘാടനം നടത്താനാണ്​ പദ്ധതി. ഫാക്ടറിയിലെ പതിനഞ്ചോളം പ്ലാന്‍റുകളിൽ പവർബോയ്​ലർ ഒന്നിന്‍റെ (പി.ബി -ഒന്ന്​) അറ്റകുറ്റപ്പണി​ പൂർത്തിയായതോടെയാണ്​ ഉദ്​ഘാടനം നടത്തുന്നത്​. വാണിജ്യാടിസ്ഥാനത്തിൽ നിർമാണം ആരംഭിക്കാൻ​ കൂടുതൽ അസംസ്കൃതവസ്തുക്കൾ ഇറക്കുമതി ചെയ്യാനുള്ള ശ്രമത്തിലാണ്​ അധികൃതർ. നിലവിൽ അസംസ്കൃതവസ്തുവായി​ ഉപയോഗിക്കാൻ പഴയ ന്യൂസ്​ പേപ്പറുകളും വൈറ്റ്​ കട്ടിങ്ങുമാണുള്ളത്​. അത്​ ഉദ്​ഘാടനത്തിന്​ മെഷീൻ പ്രവർത്തിപ്പിക്കാൻ മാത്രമേ തികയൂ. പൾപ്പ്​ അരക്കാനുള്ള പ്ലാന്‍റിന്‍റെയും വുഡ്​ കട്ടിങ്​ പ്ലാന്‍റിന്‍റെയും അടക്കം പണികൾ പൂർത്തിയാകാനുണ്ട്​. വെള്ളൂർ ഹിന്ദുസ്ഥാൻ ന്യൂസ് പ്രിന്റ് ലിമിറ്റഡ് കമ്പനി കേന്ദ്ര സർക്കാറിൽനിന്ന് ബാധ്യതകൾ തീർത്താണ് സംസ്ഥാന സർക്കാർ ഏറ്റെടുത്തത്. തുടർന്ന് കേരള പേപ്പർ പ്രോഡക്ട്​ ലിമിറ്റഡാക്കി പുനഃസംഘടിപ്പിച്ച് കഴിഞ്ഞ ജനുവരിയിൽ പ്രവർത്തനം ആരംഭിച്ചു. നാലുഘട്ടങ്ങളായാണ്​ പുനരുജ്ജീവന പ്രവർത്തനങ്ങൾ പൂർത്തിയാക്കുക.