ആനക്കൊമ്പിന് 12 ലക്ഷത്തിന് കച്ചവടമുറപ്പിച്ചു;​ വിൽക്കാൻ കാത്തുനിന്ന യുവാവിനെ വനപാലകർ പൊക്കി

കട്ടപ്പന: 12 ലക്ഷം രൂപക്ക്​ ആനക്കൊമ്പ്​ മറിച്ച് വിൽക്കാൻ ശ്രമിക്കുന്നതിനിടെ യുവാവ് വനപാലകരുടെ പിടിയിലായി. കട്ടപ്പന സുവർണഗിരിയിൽ വാടകക്ക് താമസിക്കുന്ന ടിപ്പർ ഡ്രൈവർ കണ്ണംകുളം കെ.അരുണാണ്​ (34) പിടിയിലായത്. കട്ടപ്പന ഫോറസ്റ്റ്​ ഫ്ലൈയിങ് സ്ക്വാഡ് റേഞ്ച് ഓഫിസർക്ക് ലഭിച്ച വിവരത്തിന്‍റെ അടിസ്ഥാനത്തിലായിരുന്നു പരിശോധന. ബുധനാഴ്ച രാവിലെ എട്ടിന്​ അടിമാലി -കുമളി ദേശീയ പാതയിൽ വള്ളക്കടവിന് സമീപം കരിമ്പാനിപ്പടിയിൽ വെച്ചാണ് ഇയാൾ പിടിയിലായത്. 12 ലക്ഷം രൂപക്ക്​ കച്ചവടം ഉറപ്പിച്ച ആനക്കൊമ്പ് മറ്റൊരു സംഘത്തിന് കൈമാറാൻ കരിമ്പാനിപടി റോഡരികിൽ കാർ നിർത്തി കാത്ത് നിൽക്കുകയായിരുന്നു പ്രതി. ഇയാളെ കുമളി റേഞ്ച്​ അധികൃതർക്ക്​ കൈമാറി. ജിതേഷ്​ എന്നയാളിൽനിന്ന്​ താനും സഹോദരി ഭർത്താവ് ബിബിനും ചേർന്ന് ആറ്​ ലക്ഷം രൂപക്കാണ് ആനക്കൊമ്പ് വാങ്ങിയതെന്നാണ്​ അരുൺ നൽകിയ മൊഴി. വിലയിൽ 2.7 ലക്ഷം പണമായും 20,000 രൂപ ബാങ്ക് അക്കൗണ്ട് വഴിയും ജിതേഷിന് അഡ്വാൻസായി നൽകുകയും ചെയ്തു. അരുൺ പിടിയിലായതറിഞ്ഞ്​ ഒളിവിൽ പോയ ജിതേഷിനെയും ബിബിനെയും കണ്ടെത്താൻ അന്വേഷണം ആരംഭിച്ചു. ഇടപാടിൽ കൂടുതൽ പേർക്ക്​ പങ്കുള്ളതായി സംശയിക്കുന്നു. പിടികൂടിയ ആനക്കൊമ്പിന്​ 8.4 കിലോ തൂക്കമുണ്ട്. വന്യജീവി സംരക്ഷണ നിയമപ്രകാരം 43, 49, 51 വകുപ്പുകൾ പ്രകാരമാണ്​ പ്രതികൾക്കെതിരെ കേസെടുത്തത്. കട്ടപ്പന റേഞ്ച് ഫോറസ്റ്റ് ഓഫിസർ റോയ് വി.രാജൻ, ഡെപ്യൂട്ടി റേഞ്ച് ഓഫിസർ സജി തോമസ്, ബീറ്റ് ഓഫിസർമാരായ കെ.എ. മുഹമ്മദ്, ബിനോയ് ജോസഫ്, ആർ. സന്തോഷ്​ കുമാർ, കെ.ജി. ഗോപകുമാർ എന്നിവർ ചേർന്നാണ് പ്രതിയെ പിടികൂടിയത്. ചിത്രങ്ങൾ TDG Anakombu Prathi ആന​ക്കൊമ്പുമായി പിടിയിലായ അരുൺ TDG Anakombu 2 പിടിച്ചെടുത്ത ആനക്കൊമ്പ്​