വാഴൂർ 110 കെ.വി സബ് സ്റ്റേഷൻ നിർമാണോദ്ഘാടനം 25ന്

കോട്ടയം: വാഴൂർ, പത്തനാട് പ്രദേശങ്ങളിൽ നേരിടുന്ന വൈദ്യുതി മുടക്കം, വോൾട്ടേജ് ക്ഷാമം എന്നിവ പരിഹരിക്കുന്നതിന് വാഴൂരിൽ 110 കെ.വി സബ് സ്റ്റേഷൻ നിർമിക്കുന്നു. വെള്ളിയാഴ്ച വൈകീട്ട്​ മൂന്നിന് മന്ത്രി കെ. കൃഷ്ണൻകുട്ടി ഓൺലൈനിലൂടെ നിർമാണോദ്ഘാടനം നിർവഹിക്കും. ഇതോടനുബന്ധിച്ച് വാഴൂർ കൊച്ചുകാഞ്ഞിരപ്പാറയിൽ നടക്കുന്ന പൊതുസമ്മേളനത്തിൽ ഗവ. ചീഫ് വിപ് ഡോ. എൻ. ജയരാജ് അധ്യക്ഷതവഹിക്കും. ആന്‍റോ ആന്‍റണി എം.പി മുഖ്യപ്രഭാഷണം നടത്തും. വാഴൂർ ഇലക്ട്രിക്കൽ സെക്​ഷൻ പ്രദേശത്ത് നിലവിൽ വൈദ്യുതി എത്തിക്കുന്നത് പാമ്പാടി, കാഞ്ഞിരപ്പള്ളി 110 കെ.വി സബ്‌ സ്‌റ്റേഷനിൽനിന്ന്​ കറുകച്ചാൽ 33 കെ.വി സബ്‌ സ്‌റ്റേഷനിൽനിന്നുമാണ്. വാഴൂർ സബ്‌സ്‌റ്റേഷൻ യാഥാർഥ്യമാകുന്നതോടെ പാമ്പാടി, പൊൻകുന്നം, പത്തനാട് ഇലക്ട്രിക്കൽ സെക്​ഷനുകളിലേക്ക് തടസ്സമില്ലാതെ വൈദ്യുതി എത്തിക്കാനാകും. 12.5 എം.വി.എ ശേഷിയുള്ള രണ്ടു ട്രാൻസ്‌ഫോർമറുകൾ സ്ഥാപിച്ചാണ് കൊച്ചുകാഞ്ഞിരപ്പാറയിൽ 110 കെ.വി സബ്‌സ്‌റ്റേഷൻ നിർമിക്കുക. ....................... എം.കെ. രവീന്ദ്രനെ ആദരിക്കും കോട്ടയം: സ്വാതന്ത്ര്യത്തിന്‍റെ 75ആം വാർഷികാഘോഷമായ ആസാദി കാ അമൃത് മഹോത്സവത്തിന്‍റെ ഭാഗമായി ഇൻഫർമേഷൻ ആൻഡ് പബ്ലിക് റിലേഷൻസ് വകുപ്പിന്‍റെ ആഭിമുഖ്യത്തിൽ സ്വാതന്ത്ര്യസമര സേനാനി കോരുത്തോട് മങ്കുഴിയിൽ എം.കെ. രവീന്ദ്രനെ (എം.കെ. രവീന്ദ്രൻ വൈദ്യർ) ആദരിക്കും. വ്യാഴാഴ്ച ഉച്ചക്ക്​ രണ്ടിന് അദ്ദേഹത്തി​ന്‍റെ വീട്ടിലെത്തി സെബാസ്റ്റ്യൻ കുളത്തുങ്കൽ എം.എൽ.എയുടെ നേതൃത്വത്തിലാണ് ആദരിക്കുക.