ആദ്യദിനത്തിൽ 100 കുട്ടികൾക്ക് വാക്‌സിൻ നൽകി

12-14​ പ്രായത്തിലെ വാക്‌സിനേഷൻ തുടങ്ങി കോട്ടയം: ജില്ലയിൽ 12-14 പ്രായമുള്ള 100 കുട്ടികൾക്ക് ആദ്യദിനത്തിൽ വാക്‌സിൻ നൽകിയതായി ജില്ല മെഡിക്കൽ ഓഫിസർ ഡോ. എൻ. പ്രിയ അറിയിച്ചു. കോട്ടയം ജില്ല ആശുപത്രിയിൽ മാത്രമാണ് ബുധനാഴ്ച വാക്‌സിനേഷൻ സജ്ജീകരിച്ചിരുന്നത്. ഹൈദരാബാദ് കേന്ദ്രമായ ബയോളജിക്കൽ ഇ-ലിമിറ്റഡ് എന്ന കമ്പനി ഉൽപാദിപ്പിക്കുന്ന കോർബിവാക്‌സ് എന്ന വാക്‌സിനാണ്​ കുട്ടികൾക്ക് നൽകുന്നത്​. വ്യാഴാഴ്ച കോട്ടയം ജനറൽ ആശുപത്രിക്ക് പുറമെ ചങ്ങനാശ്ശേരി, പാലാ ജനറൽ ആശുപത്രികളിലും കുട്ടികൾക്ക് വാക്‌സിനേഷൻ നൽകും. 2008, 2009, 2010 വർഷങ്ങളിൽ ജനിച്ച കുട്ടികൾക്കാണ്​ വാക്‌സിനേഷൻ. വാക്‌സിൻ സ്വീകരിക്കുന്ന ദിവസം കുട്ടിക്ക് 12 വയസ്സ്​ പൂർത്തിയായിരിക്കണം. www.cowin.gov.in എന്ന പോർട്ടലിൽ മാതാപിതാക്കളുടെയോ മറ്റുള്ളവരുടെയോ ഫോൺ നമ്പർ ഉപയോഗിച്ച് രജിസ്റ്റർ ചെയ്ത്, ജനനത്തീയതി തെളിയിക്കുന്ന രേഖയുമായി കേന്ദ്രത്തിലെത്തണം. നാല് മുതൽ ആറു ആഴ്ചക്കിടയിൽ രണ്ടാം ഡോസ് സ്വീകരിക്കണം. ---------- ഇന്ന് 72 കേന്ദ്രങ്ങളിൽ വാക്‌സിനേഷൻ കോട്ടയം: ജില്ലയിൽ വ്യാഴാഴ്ച 72 കേന്ദ്രങ്ങളിൽ കോവിഡിനെതിരായ വാക്‌സിനേഷൻ നൽകുമെന്ന് കലക്ടർ ഡോ. പി.കെ. ജയശ്രീ അറിയിച്ചു. 12നും 14നുമിടയിൽ പ്രായമുള്ളവർക്ക് മൂന്നും 15നും 18നുമിടയിൽ പ്രായമുള്ളവർക്ക് അഞ്ചും മുതിർന്നവർക്ക് 64 കേന്ദ്രങ്ങളിലും വാക്‌സിൻ നൽകും. അർഹരായവർക്ക് ഈ കേന്ദ്രങ്ങളിൽ നേരിട്ടെത്തിയോ ഓൺലൈനായി www.cowin.gov.in എന്ന പോർട്ടൽ വഴി ബുക്ക് ചെയ്തോ വാക്‌സിൻ സ്വീകരിക്കാം. ---------- ഗുഡ്​സ്​ഷെഡ് റോഡ് താൽക്കാലികമായി അടക്കും കോട്ടയം: റെയിൽപാത ഇരട്ടിപ്പിക്കലിന്‍റെ ഭാഗമായി ടണലുകളും സംരക്ഷണഭിത്തിയും നിർമിക്കുന്ന ജോലികൾ നടക്കുന്നതിനാൽ കോട്ടയം റെയിൽവേ സ്റ്റേഷൻ റോഡ് മുതൽ മദർ തെരേസ റോഡ് വരെ ഗുഡ്സ്​ ഷെഡ് റോഡ് താൽക്കാലികമായി അടച്ചിടുമെന്ന്​ എ.ഡി.എം ജിനു പുന്നൂസ് അറിയിച്ചു.