സുരക്ഷാ സംവിധാനങ്ങളില്ലാതെ ഈരാറ്റുപേട്ട-വാഗമൺ സമാന്തരപാത

ഈരാറ്റുപേട്ട: സുരക്ഷാസംവിധാനങ്ങളുടെ അഭാവത്തിൽ അപകടക്കെണിയായി ഈരാറ്റുപേട്ട-വാഗമൺ സമാന്തരപാത. തീക്കോയി-മുപ്പതേക്കർ-ഒറ്റയീട്ടി-വാഗമൺ വരെ നീളുന്ന സമാന്തര പാതയിൽ സുരക്ഷാ സംവിധാനങ്ങൾ ഒരുക്കണമെന്ന ആവശ്യത്തിന്​ വർഷങ്ങളുടെ പഴക്കമുണ്ട്. എന്നാൽ, നടപടിയൊന്നുമില്ല. കഴിഞ്ഞ ഒരാഴ്ചക്കിടെ രണ്ട് അപകടങ്ങളാണ് ഇവിടെയുണ്ടായത്. ഇതിൽ ഒരാൾ മരിക്കുകയും ചെയ്തു. കഴിഞ്ഞ അഞ്ചുവർഷത്തിനിടെ ആറ് ജീവനാണ് ഈ റോഡിൽ നഷ്ടപ്പെട്ടത്. ഓരോ അപകടം കഴിയുമ്പോഴും ക്രാഷ് ബാരിയറുകളും മുന്നറിയിപ്പ്​ ബോർഡുകളും സ്ഥാപിക്കണമെന്ന ആവശ്യവുമായി നാട്ടുകാർ രംഗത്തെത്തുമെങ്കിലും ഇതുവരെ നടപടിയൊന്നുമായില്ല. ഒറ്റയീട്ടി ഭാഗത്തുനിന്ന്​ ഇറക്കം ഇറങ്ങി വരുന്ന വാഹനങ്ങളാണ് അപകടത്തിൽപെടുന്നത്. ഒരുവശത്ത് ചെങ്കുത്തായ പാറക്കെട്ടുകളും മറുവശത്ത് 500 അടി വരെ താഴ്ചയുള്ള കൊക്കയുമാണ്. റോഡിൽ പലഭാഗത്തും വെള്ളം ഒഴുകിപ്പോകുന്നതിന് ഹംപുകളും സ്ഥാപിച്ചിട്ടുണ്ട്. ഇറക്കം ഇറങ്ങി വരുന്ന വാഹനങ്ങൾ ഈ ഹംപുകളിൽ ചാടി നിയന്ത്രണം വിട്ടാണ് അപകടങ്ങൾ പലതും ഉണ്ടാകുന്നതെന്ന്​ നാട്ടുകാർ പറയുന്നു. കഴിഞ്ഞയാഴ്ച മഞ്ഞപ്പാറ ഭാഗത്തുണ്ടായ അപകടത്തിൽപെട്ട കാർ 400 അടിയോളം താഴ്ചയിലാണ് പതിച്ചത്. ജനവാസം കുറഞ്ഞ പ്രദേശമായതിനാൽ ഇത്രയും താഴെ ഇറങ്ങി രക്ഷാപ്രവർത്തനം നടത്തുന്നത് കാലതാമസവും വരുത്തും. ഇത് അപകടത്തിൽപെടുന്നവർ മരിക്കുന്നതിനുള്ള സാധ്യതയും കൂട്ടും. പ്രദേശത്ത് സുരക്ഷാ സംവിധാനങ്ങളോ മുന്നറിയിപ്പ്​ ബോർഡുകളോ ഇല്ലാത്തത് പ്രദേശവാസികളല്ലാത്തവർക്ക് അപകടസാധ്യത അറിയാൻ സാധിക്കുന്നില്ല. വാഗമണ്ണിലേക്കുള്ള പ്രധാന റോഡ് തകർന്ന്​ കിടക്കുന്നതിനാൽ ധാരാളം വാഹനങ്ങളാണ് ഇതുവഴി വരുന്നത്. റോഡിനിരുവശത്തെയും കാട്​ തെളിക്കുകയും ക്രാഷ് ബാരിയറുകളും മുന്നറിയിപ്പ്​ ബോർഡുകളും സ്ഥാപിക്കുകയും ചെയ്താൽ അപകടങ്ങൾ ഒരു പരിധിവരെ ഒഴിവാക്കാൻ സാധിക്കുമെന്ന് നാട്ടുകാർ പറയുന്നു. പടം ഈരാറ്റുപേട്ട-വാഗമൺ സമാന്തരപാത