തവളക്കുഴിയില്‍ അപകടം; വഴിയാത്രക്കാരന് പരിക്ക്

ഏറ്റുമാനൂര്‍: തവളക്കുഴി ജങ്​ഷന് സമീപം നിയന്ത്രണംവിട്ട കാര്‍ വഴിയാത്രക്കാരനെ ഇടിച്ച് തെറിപ്പിച്ചു. തുടർന്ന്​ കാർ മറ്റ്​ രണ്ട്​ വാഹനങ്ങളിലും ഇടിച്ചു. ഞായറാഴ്ച രാത്രി എട്ടോടെ തവളക്കുഴി ജങ്​ഷനിലായിരുന്നു അപകടം. എറണാകുളം ഭാഗത്തുനിന്നും വന്ന ഓള്‍ട്ടോ കാറാണ് അപകടമുണ്ടാക്കിയത്. നിയന്ത്രണംവിട്ട കാര്‍ വള്ളിക്കാട് ഭാഗത്തേക്ക് തിരിയുകയായിരുന്ന സ്വിഫ്റ്റ് കാറിനെയും തുടര്‍ന്ന് എറണാകുളം ഭാഗത്തേക്കുപോയ ഇന്നോവ കാറിനെയും ഇടിക്കുകയായിരുന്നു. ഈ സമയം റോഡ് ക്രോസ് ചെയ്ത വഴിയാത്രക്കാരനെയും ഇടിച്ചു തെറിപ്പിച്ചെന്ന് നാട്ടുകാര്‍ പറഞ്ഞു. പരിക്കേറ്റയാളെ നാട്ടുകാര്‍ ചേര്‍ന്നാണ് സമീപത്തെ ആശുപത്രിയിലെത്തിച്ചത്. ഇയാളുടെ പരിക്ക് ഗുരുതരമല്ലെന്നാണ് വിവരം. അപകടത്തെതുടര്‍ന്ന് നഗരത്തില്‍ അരമണിക്കൂറോളം ഗതാഗതം തടസ്സപ്പെട്ടു. ഏറ്റുമാനൂര്‍ പൊലീസ് സ്ഥലത്തെത്തി വാഹനങ്ങള്‍ മാറ്റിയാണ് ഗതാഗതം പുനഃസ്ഥാപിച്ചത്.