കർഷകർക്ക് ആശ്വാസമേകാൻ ജില്ല പഞ്ചായത്തിന്‍റെ മൂന്ന്​ കൊയ്ത്ത്​-മെതി യന്ത്രങ്ങൾ കൂടി

കോട്ടയം: നെൽകർഷകർക്ക് ആശ്വാസമേകി വിളവെടുപ്പിനായി ജില്ലയിൽ മൂന്നു കൊയ്ത്ത്​-മെതിയന്ത്രങ്ങൾ കൂടി. വാർഷിക പദ്ധതിയിലുൾപ്പെടുത്തി 85.5 ലക്ഷം രൂപ ചെലവഴിച്ച് ജില്ല പഞ്ചായത്ത് വാങ്ങിയ മൂന്ന് കൊയ്ത്ത്​-മെതിയന്ത്രങ്ങളുടെ വിതരണോദ്ഘാടനം ഏറ്റുമാനൂർ ചെറുവാണ്ടൂർ പുഞ്ച പാടശേഖരത്തിൽ ജോസ് കെ.മാണി എം.പി നിർവഹിച്ചു. കേന്ദ്ര-സംസ്ഥാന സർക്കാറകളുടെ കാർഷിക യന്ത്രവത്കരണ ഉപപദ്ധതിയായ സ്മാം പദ്ധതിയിൽ 50 ശതമാനം സബ്സിഡിയോടെ കർഷകർ വാങ്ങിയ രണ്ടു ട്രാക്ടറുകളുടെ വിതരണവും എം.പി നിർവഹിച്ചു. ജില്ല പഞ്ചായത്ത് പ്രസിഡന്‍റ്​ നിർമല ജിമ്മി അധ്യക്ഷതവഹിച്ചു. ഏറ്റുമാനൂർ നഗരസഭ അധ്യക്ഷ ലൗലി ജോർജ് പടികര മുഖ്യപ്രഭാഷണം നടത്തി. കൃഷി അസി. എക്സിക്യൂട്ടിവ് എൻജിനീയർ ടി. സുമേഷ്​കുമാർ പദ്ധതി വിശദീകരിച്ചു. ജില്ല പഞ്ചായത്ത് വികസനകാര്യ സ്ഥിരംസമിതി അധ്യക്ഷ മഞ്ജു സുജിത്, ജില്ല പഞ്ചായത്ത്​ അംഗങ്ങളായ ജോസ് പുത്തൻകാല, പി.എം. മാത്യു, രാജേഷ് വാളിപ്ലാക്കൻ, നഗരസഭാംഗങ്ങളായ എസ്. ബീന, എം.കെ. സോമൻ, പാടശേഖര സമിതി കൺവീനർ അഡ്വ. പ്രശാന്ത് രാജൻ, കൃഷി അസി. എക്സിക്യൂട്ടിവ് എൻജിനീയർ മുഹമ്മദ് ഷരീഫ് എന്നിവർ സംസാരിച്ചു. ട്രാക്ടറടക്കമുള്ള കാർഷികയന്ത്രങ്ങൾ https://agrimachinery.nic.in/ എന്ന വെബ്സൈറ്റിൽ ഓൺലൈനായി രജിസ്റ്റർ ചെയ്താൽ വ്യക്തികൾക്ക് 40 മുതൽ 60 ശതമാനം വരെയും ഗ്രൂപ്പുകൾക്ക് 80 ശതമാനം വരെയും സബ്സിഡിയോടെ ലഭിക്കും. ജില്ലയിൽ ഇതോടെ 11 കൊയ്ത്ത്​-മെതി യന്ത്രങ്ങൾ ലഭ്യമാവും. കൊയ്ത്ത്​-മെതി യന്ത്രങ്ങളുടെ വാടകയിനത്തിൽ മാത്രം കഴിഞ്ഞവർഷം 14ലക്ഷം രൂപ കോഴയിലെ കാർഷിക യന്ത്രങ്ങൾ വാടകക്ക്​ നൽകുന്ന കസ്റ്റം ഹയറിങ്​ സെന്‍ററിന് ലഭിച്ചതായി കൃഷി അസി. എക്സിക്യൂട്ടിവ് എൻജിനീയർ പറഞ്ഞു. ജില്ല പഞ്ചായത്തിന്‍റെ വാർഷിക പദ്ധതിയിലൂടെ 27 ലക്ഷം രൂപയുടെ കൊയ്ത്ത്​-മെതിയന്ത്രം കഴിഞ്ഞ മാർച്ചിൽ നൽകിയിരുന്നു.