ശമ്പളം നൽകുന്നതിൽ കെ.എസ്​.ആർ.ടി.സിക്കും കൊച്ചി മെട്രോക്കും രണ്ട്​ നീതി

-രണ്ട്​ സംവിധാനങ്ങളും വൻ നഷ്ടത്തിൽ കോട്ടയം: ജോലി ചെയ്യുന്നവർക്ക്​ കൂലി നൽകുന്നതിൽ കെ.എസ്​.ആർ.ടി.സിക്കും കൊച്ചി മെട്രോക്കും രണ്ട്​ നീതി. പൊതുജനങ്ങളുടെ യാത്രാസൗകര്യത്തിന്​ സ്ഥാപിക്കപ്പെട്ട രണ്ട്​ സംവിധാനങ്ങളും വൻ നഷ്ടത്തിലാണെങ്കിലും കൊച്ചി മെട്രോയിലെ ജീവനക്കാർക്ക്​ ശമ്പളം കൃത്യമായി ലഭിക്കുന്നുണ്ട്​. എന്നാൽ, കെ.എസ്​.ആർ.ടി.സിയിൽ ശമ്പളം​ അവസാന പരിഗണന മാത്രമാണ്. വായ്പ തിരിച്ചടവുമുതൽ സ്​പെയർപാർട്ട്​​ വാങ്ങുന്നതിനുവരെ തുക മാറ്റിവെച്ചശേഷമേ ശമ്പളത്തെക്കുറിച്ച്​ ചിന്തിക്കുന്നുള്ളൂ. 2022 ​മേയ്​ അഞ്ചിന്​ 3785 ബസുകൾ ഓടിക്കാൻ 7570 ഡ്രൈവർമാരെയും കണ്ടക്ടർമാരെയുമാണ്​ നിയോഗിച്ചിരുന്നത്​. ഇവർ 12.60 ലക്ഷം കിലോമീറ്റർ ബസുകൾ ഓടിച്ച്​ 19.77 ലക്ഷം യാത്രക്കാരെ കയറ്റിയിറക്കി. 6.698 കോടിയായിരുന്നു ഈ ദിവസത്തെ വരുമാനം. ഒരു ബസിന്​​ 17,698 രൂപ പ്രകാരം ശരാശരി വരുമാനം നേടി. ഒരു കിലോമീറ്ററിൽനിന്ന്​ കോർപറേഷന്​ ലഭിച്ച വരുമാനം​ 53.15 രൂപയാണ്​. ഏപ്രിലിൽ 158 കോടിയായിരുന്നു കെ.എസ്​.ആർ.ടി.സിയുടെ വരുമാനം. ഇതിൽ ശമ്പളം നൽകാൻ വേണ്ടത്​ 82 കോടി. പ്രതിദിനം 5.56 കോടി രൂപ വരുമാനമുണ്ടാക്കുന്ന കെ.എസ്​.ആർ.ടി.സിക്ക്​ ശമ്പളയിനത്തിൽ പ്രതിദിനം ചെലവഴിക്കേണ്ടിവരുന്നത്​ 2.73 കോടിയാണ്​. എന്നിട്ടും ശമ്പളത്തിന്​ പ്രഥമ പരിഗണന നൽകാൻ മാനേജ്​മെന്‍റ്​ തയാറാകുന്നില്ല. അതേസമയം, നഷ്ടം കുറക്കാനുള്ള മറ്റ്​ വഴികൾ ഉണ്ടായിട്ടും പ്രയോജനപ്പെടുത്താനും അവർ തയാറാകുന്നില്ല. ലഭ്യമായ കണക്കുകൾ അനുസരിച്ച്​ മേയ്​ അഞ്ചിന്​ 2,95,602 ലിറ്റർ ഡീസലാണ്​ കെ.എസ്​.ആർ.ടി.സി ഉപയോഗിച്ചത്​. മൊത്തവില അനുസരിച്ച്​ കോർപറേഷന്​ ഡീസൽ ലഭിക്കുന്നത്​ ലിറ്ററിന്​ 128.77 രൂപ നിരക്കിലാണ്​. പുറത്ത്​ സ്വകാര്യ പമ്പിൽനിന്ന്​ 102.35 രൂപക്കും കെ.എസ്​.ആർ.ടി.സിക്ക്​ ഡീസൽ നിറക്കാനാവും. ഇങ്ങനെ ചെയ്താൽ പ്രതിദിനം 78 ലക്ഷം രൂപയുടെ ലാഭം കെ.എസ്​.ആർ.ടി.സിക്ക്​ ഉണ്ടാകും. ​ കൊച്ചി മെട്രോയുടെ പ്രതിദിന നഷ്ടം ഏകദേശം ഒരു കോടി രൂപയാണ്​. ഇത്​ സർക്കാർ നികത്തുന്നുണ്ട്​. മെട്രോയുടെ പ്രതിദിന യാത്രികരു​ടെ എണ്ണം 60,359 മാത്രമാണ്​. ഇതേ മാനദണ്ഡമനുസരിച്ച്​ നോക്കിയാൽ ദിവസവും 19 ലക്ഷത്തിലേറെ യാത്രക്കാരെ കൊണ്ടുപോകുന്ന കെ.എസ്​.ആർ.ടി.സിക്ക്​ സർക്കാർ പ്രതിദിനം 32.75 കോടി രൂപ നൽകണം. -ടി. ജുവിൻ