ഹോട്ടലുകളിൽ ആരോഗ്യവകുപ്പ് പരിശോധന നടത്തി

ഏറ്റുമാനൂർ: കുടുംബാരോഗ്യ കേന്ദ്രത്തിന്റെ ആഭിമുഖ്യത്തിൽ ഏറ്റുമാനൂർ ടൗണിൽ വിവിധ ഹോട്ടലുകൾ, ബേക്കറി, കൂൾബാർ, ഐസ്ക്രീം ഫാക്ടറി, ഷവർമ കേന്ദ്രങ്ങളിൽ പരിശോധന നടത്തി. കുടുംബാരോഗ്യ കേന്ദ്രം എ.എം.ഒ ഡോ. ആശ ജോ ആൻ, ഹെൽത്ത്‌ സൂപ്പർവൈസർ സുരേഷ്‌കുമാർ, ഹെൽത്ത്‌ ഇൻസ്‌പെക്ടർ മരിയൻ ബിന്ദു, ജൂനിയർ ഹെൽത്ത്‌ ഇൻസ്‌പെക്ടർമാരായ ശ്രീനിവാസൻ, അനിൽകുമാർ, നിഷ എന്നിവർ നേതൃത്വം നൽകി. വരുംദിവസങ്ങളിലും പരിശോധന തുടരുമെന്ന് എ.എം.ഒ അറിയിച്ചു. ഗാന്ധിനഗർ: മെഡിക്കൽ കോളജ് പരിസരങ്ങളിലെ ഹോട്ടലുകൾ, മറ്റ് ഭക്ഷണശാലകൾ, ശീതളപാനീയ വില്പനക്കടകൾ എന്നിവിടങ്ങളിൽ ആരോഗ്യ വകുപ്പ് അധികൃതരുടെ നേതൃത്വത്തിൽ പരിശോധന നടത്തി. അതിരമ്പുഴ കുടുംബാരോഗ്യ കേന്ദ്രത്തിലെ സൂപ്പർവൈസർ സി.എൻ. വേണുഗോപാലിന്‍റെ നേതൃത്വത്തിൽ കുമാരനല്ലൂർ സെക്ഷൻ ഹെൽത്ത് ഇൻസ്പെക്ടർ ബിജു കിഴക്കേടം, ആർപ്പൂക്കര പഞ്ചായത്ത് എച്ച്.ഐ കെ.സി. അനൂപ് കുമാർ, ജെ.എൻ.എച്ച്.ഐ ഗീത വിജയപ്പൻ, ഡോ. റാണി, ഡോ. പ്രതിഭ എന്നിവരുടെ നേതൃത്വത്തിലായിരുന്നു പരിശോധന. ഇവരുടെ നേതൃത്വത്തിൽ കഴിഞ്ഞ ദിവസം പനമ്പാലം, കരിപ്പൂത്തട്ട് മേഖലകളിലെ ഭക്ഷണശാലകളിലും പരിശോധന നടത്തിയിരുന്നു. കഴിഞ്ഞ ദിവസം മെഡിക്കൽ കോളജിന്​ പരിസരത്തെ ഹോട്ടലിൽനിന്ന് ഷവർമ കഴിച്ചതിനെത്തുടർന്ന് മെഡി. കോളജ് വിദ്യാർഥിനിക്ക് ഭക്ഷ്യവിഷബാധയേറ്റിരുന്നു.