മെഡിക്കൽ കോളജ് ഹൃദയശസ്ത്രക്രിയ വിഭാഗത്തിൽ തീപിടിത്തം

ഗാന്ധിനഗർ: കോട്ടയം മെഡിക്കൽ കോളജിലെ ഹൃദയ ശസ്ത്രക്രിയ വിഭാഗത്തിൽ തീപിടിത്തം. കാർഡിയോ തൊറാസിക് വിഭാഗത്തിലെ ശീതീകരണ വിഭാഗത്തിൽ ഉണ്ടായ വൈദ്യുതി തകരാറാണ് കാരണമെന്ന്​ അധികൃതർ അറിയിച്ചു. ചൊവ്വാഴ്ച രാവിലെ 10 മണിയോടെയായിരുന്നു സംഭവം. ശീതീകരണിയന്ത്രത്തിൽനിന്ന്​ പുകയും തീയും ഉയരുന്നതുകണ്ട് രോഗികളുടെ കൂട്ടിരിപ്പുകാർ അധികൃതരെ വിവരം അറിയിക്കുകയായിരുന്നു. സുരക്ഷവിഭാഗം തീ അണക്കാൻ ശ്രമിച്ചെങ്കിലും പരാജയപ്പെട്ടു. സ്ഥലത്തെത്തിയ പൊലീസ് അഗ്നിശമന സേനയെ അറിയിക്കുകയും രണ്ടു യൂനിറ്റ്​ സേനാംഗങ്ങൾ സ്ഥലത്തെത്തി വൈദ്യുതി ലൈൻ വിച്ഛേദിച്ചശേഷം തീ അണക്കുകയുമായിരുന്നു. രണ്ട് ശീതീകരണ യന്ത്രങ്ങൾ കത്തിനശിച്ചതുൾപ്പെടെ 50,000 രൂപയുടെ നഷ്ടം ഉണ്ടായതായി ആശുപത്രി സൂപ്രണ്ട്​ ഡോ. ടി.കെ. ജയകുമാർ പറഞ്ഞു.