മുട്ടമ്പലം ഗേറ്റ്​ വരെ പാളം തയാർ

കോട്ടയം: പാത ഇരട്ടിപ്പിക്കൽ ജോലികൾ അവസാനഘട്ടത്തിലെത്തിനിൽക്കെ, ഇനി പാളം സ്ഥാപിക്കാൻ അവശേഷിക്കുന്നത്​ കോട്ടയം റെയിൽവേ സ്​റ്റേഷനോട്​ ചേർന്ന ടണൽ ഭാഗത്ത്​. മറ്റ്​ ഭാഗങ്ങളിലെല്ലാം പാളം സ്ഥാപിച്ച്​ ലിങ്കിങും പരിശോധനയും പൂർത്തിയാക്കിയിട്ടുണ്ട്​. ചിങ്ങവനം ഭാഗത്തുനിന്ന്​ ​മുട്ടമ്പലം ഗേറ്റ്​ വരെ പാളം തയാറാക്കുകയും ലിങ്കിങ്​ പൂർത്തിയാക്കുകയും ചെയ്തിട്ടുണ്ട്​. ഏറ്റുമാനൂർ ഭാഗത്തുനിന്നുള്ള പാളം നിർമാണം പൂർത്തിയായി. നാഗമ്പടം വരെ ലിങ്കിങും നടത്തി. മഴയാണ്​ ടണൽ ഭാഗത്ത് പാളം സ്ഥാപിക്കുന്ന ജോലികളെ ബാധിച്ചതെന്ന്​ റെയിൽവേ നിർമാണവിഭാഗം പറയുന്നു. കെ.​കെ.റോഡിന്‍റെ ഭാഗത്ത്​ പാളം ഇട്ടുകഴിഞ്ഞു. നേരത്തേ അമ്പലം സ്ഥിതി ചെയ്തിരുന്ന ഭാഗത്താണ്​ ഇനി പാളം സ്ഥാപിക്കൽ ജോലികൾ അവശേഷിക്കുന്നത്​. ദിവസങ്ങൾക്കുള്ളിൽ നിർമാണം പൂർത്തിയാക്കാനാകുമെന്ന്​ ഇവർ പറയുന്നു. ട്രെയിൻ ഗതാഗതം നിയന്ത്രിക്കുന്ന ദിവസങ്ങളിൽ ഇരുഭാഗത്തുനിന്നുള്ള പാളങ്ങളും റെയിൽവേ സ്​റ്റേഷനുമായി ബന്ധിപ്പിക്കും. ഇതിനൊപ്പം സിഗ്​നലുകൾ അടക്കമുള്ളവയും സജ്ജീകരിക്കും.