സ്വീഡിഷ് സർവകലാശാലയുമായി കൈകോർത്ത് എം.ജി

കോട്ടയം: സ്വീഡനിലെ സ്റ്റോക്ഹോം സർവകലാശാല നേതൃത്വം നൽകുന്ന പഠനപരിപാടിയിലേക്ക് മഹാത്മാഗാന്ധി സർവകലാശാല വൈസ് ചാൻസലർ പ്രഫ. സാബു തോമസ് ഉൾപ്പെടെയുള്ള വിദഗ്​ധർക്ക്​ ക്ഷണം. ശുദ്ധജലം കിട്ടാക്കനിയായ ഇന്ത്യയിലെ വിദൂരഗ്രാമങ്ങളിൽ വികേന്ദ്രീകൃതവും സ്വാശ്രിതവുമായ ജലശുദ്ധീകരണ പ്രവർത്തനങ്ങൾ നടപ്പാക്കുന്നതിനാവശ്യമായ ഉപകരണങ്ങളും പദാർഥങ്ങളും വികസിപ്പിച്ചെടുക്കുന്നതിൽ സംഭവിച്ചിട്ടുള്ള ഗവേഷണപരമായ പോരായ്മകളും തുടർഗവേഷണങ്ങളുടെ അപര്യാപ്തതയും പുതിയ ഗവേഷണങ്ങൾക്കുള്ള സാധ്യതകളും കണ്ടെത്തുന്നതിനാണ്​ പഠനം. ഐക്യരാഷ്ട്രസഭയുടെ നിർദേശമനുസരിച്ച് സ്റ്റോക്ഹോം സർവകലാശാലയാണ് പഠനപദ്ധതി ഏറ്റെടുത്തിരിക്കുന്നത്​. പോളിമർ-നാനോ സയൻസ് രംഗത്തെ അറിയപ്പെടുന്ന ശാസ്ത്രജ്ഞൻ കൂടിയായ പ്രഫ. സാബു തോമസ്, പ്രഫ. നന്ദകുമാർ കളരിക്കൽ, ഡോ. നിവേദിത ശങ്കർ, ഡോ. ക്രിസ്റ്റഫർ ഗുണ എന്നിവരുടെ സേവനമാണ്​ മഹാത്മാഗാന്ധി സർവകലാശാലയിൽനിന്ന് ആവശ്യപ്പെട്ടിട്ടുള്ളത്. സ്റ്റോക്​ഹോം സർവകലാശാലയിലെ പ്രഫ. അജി പി. മാത്യുവാണ് പദ്ധതിക്ക് നേതൃത്വം നൽകുന്നത്. പരീക്ഷഫലം 2022 ജനുവരിയിൽ നടന്ന മൂന്നാം സെമസ്റ്റർ എം.എസ്​സി - മെഡിക്കൽ ഡോക്യുമെന്‍റേഷൻ (നോൺ-സി.എസ്.എസ്- റെഗുലർ / സപ്ലിമെന്‍ററി) പരീക്ഷഫലം പ്രസിദ്ധീകരിച്ചു. സൂക്ഷ്മപരിശോധനക്കുള്ള അപേക്ഷ 160 രൂപ ഫീസ് സഹിതം മേയ് 10വരെ പരീക്ഷ കൺട്രോളറുടെ കാര്യാലയത്തിൽ സ്വീകരിക്കും. പ്രഭാഷണം ഇന്ന് മഹാത്മാഗാന്ധി സർവകലാശാല ലൈബ്രറി ആഭിമുഖ്യത്തിൽ സംഘടിപ്പിക്കുന്ന പ്രഭാഷണ പരമ്പരയുടെ ഭാഗമായി സർവകലാശാല പരീക്ഷ കൺട്രോളർ ഡോ. സി.എം. ശ്രീജിത്​ സംസാരിക്കുന്നു. വെള്ളിയാഴ്ച രാത്രി 7.30ന് ഫേസ്ബുക്ക് ലൈവിൽ 'കീ-ടു ഹാപ്പിനെസ്' എന്നതാണ് വിഷയം. ഫോൺ: 9446238800.