ജില്ലയിലെ കോൺഗ്രസ്​ പ്രവർത്തനം; അതൃപ്തി തുറന്നുപറഞ്ഞ്​ കെ. സുധാകരൻ

കോട്ടയം: കോൺഗ്രസ്​ ജില്ല നേതൃത്വത്തിന്‍റെ പ്രവർത്തനങ്ങളിലെ അതൃപ്തി തുറന്നുപറഞ്ഞ്​ കെ.പി.സി.സി പ്രസിഡന്‍റ്​ കെ. സുധാകരൻ. ജില്ല കോൺഗ്രസ്​ നേതൃയോഗത്തിലായിരുന്നു പോരായ്മകൾ ചൂണ്ടിക്കാട്ടിയുള്ള അദ്ദേഹത്തിന്‍റെ വിമർശനങ്ങൾ. മോശം പ്രകടനമാണ്​ ജില്ലയിലേതെന്നും ഇതിന്​ മാറ്റം വേണമെന്നും അദ്ദേഹം നിർദേശിച്ചു. നേതാക്കൾ തമ്മിലുള്ള ഭിന്നതയാണ്​ ജില്ലയിലെ പ്രവർത്തനങ്ങളെ താളം തെറ്റിക്കുന്നത്​. പ്രശ്നങ്ങൾക്ക്​ അടിയന്തര പരിഹാരം കാണണം. കോൺഗ്രസിനെ ശക്തിപ്പെടുത്താൻ ​കോട്ടയത്തെ നേതാക്കൾ തയാറാകണം. മോശം പ്രകടനം തുടർന്നാൽ നേതൃത്വത്തിലടക്കം അഴിച്ചുപണി വേണ്ടിവരുമെന്നും അദ്ദേഹം മുന്നറിയിപ്പ്​ നൽകി. കോൺഗ്രസിന്​ ഏറ്റവും ശക്തിയുണ്ടായിരുന്നു സ്ഥലമായിരുന്നു കോട്ടയം. ആ നിലയിലേക്ക്​ മടങ്ങിപ്പോകണം. ഒറ്റക്കെട്ടായി നിന്നാൽ അതിനുകഴിയും. കോട്ടയത്തെ ​നേതാക്കളും പ്രവർത്തകരുമാണ്​ ശക്തമായി പോകണോ വീണ്ടും ദുർബലമാകണമോയെന്ന്​ തീരുമാനിക്കേണ്ടതെന്നും സുധാകരൻ പറഞ്ഞു. അടുത്തിടെ കോട്ടയത്ത്​ പ്രതിപക്ഷനേതാവ്​ വി.ഡി. സതീശൻ ഉദ്​ഘാടനം ചെയ്ത സിൽവർലൈൻ ജനകീയ പ്രതിഷേധ സദസ്സ്​​ ഡി.സി.സി പ്രസിഡന്‍റ്​ നാട്ടകം സുരേഷ്​ ബഹിഷ്​കരിച്ചതിനെ തുടർന്ന്​ ഉട​ലെടുത്ത ആശയക്കുഴപ്പം പരിഹരിക്കാൻ ലക്ഷ്യമിട്ടായിരുന്നു കോട്ടയം ദർശന ഓഡിറ്റോറിയത്തിൽ നേതൃ​യോഗം സംഘടിപ്പിച്ചത്​. സുധാകരനുപുറമേ, വി.ഡി. സതീശൻ, ഉമ്മൻ ചാണ്ടി, എം.എം. ഹസൻ തുടങ്ങി നേതാക്കളുടെ വലിയൊരു നിര യോഗത്തിനെത്തിയിരുന്നു. കോൺഗ്രസ്​ യോഗത്തിനുശേഷം കോട്ടയം ഡി.സി.സി ഓഫിസിൽ ​വി.ഡി. സതീശന്‍റെ സാന്നിധ്യത്തിൽ യു.ഡി.എഫ്​ യോഗവും ചേർന്നു. ഇതിൽ ജില്ലയിലെ യു.ഡി.എഫിലെ പ്രവർത്തനം സജീവമല്ലെന്ന വിമർശനമുണ്ടായി. ഇത്​ പരിശോധിക്കുമെന്ന്​ സതീശൻ ഉറപ്പുനൽകി.