റവന്യൂ കലോത്സവം: കായിക-അത്​ലറ്റിക്​ മത്സരങ്ങൾ ഇന്നുമുതൽ

കോട്ടയം: റവന്യൂ കലോത്സവത്തിന്റെ ഭാഗമായ കായിക-അത്​ലറ്റിക്സ് മത്സരങ്ങൾ ഞായറാഴ്ച തുടങ്ങും. പാലാ മുനിസിപ്പൽ സ്​റ്റേഡിയത്തിൽ രാവിലെ ഒമ്പതിന് കലക്ടർ ഡോ. പി.കെ. ജയശ്രീ ഉദ്ഘാടനം നിർവഹിക്കും. തുടർന്ന് അത്​ലറ്റിക്സ്​ വിഭാഗത്തിൽ 100, 400, 1500 മീറ്റർ, 4x100 റിലേ മത്സരങ്ങളും ഷോട്ട്പുട്ട്, ലോങ്ജംപ്​​, പഞ്ചഗുസ്തി മത്സരങ്ങളും നടക്കും. 25ന് രാവിലെ ഒമ്പതിന് കോട്ടയം ഇൻഡോർ സ്​റ്റേഡിയത്തിൽ ബാഡ്മിന്റൺ മത്സരം നടക്കും. വനിതകൾക്കും പുരുഷന്മാർക്കുമായി പ്രത്യേക സിംഗിൾസ്, ഡബിൾസ്, മിക്സഡ് ഡബിൾസ് മത്സരങ്ങളാണ് നടക്കുക. നെഹ്റു സ്​റ്റേഡിയത്തിൽ 26ന് രാവിലെ ഒമ്പതുമുതൽ ക്രിക്കറ്റ് മത്സരം നടക്കും. 11 അംഗ ക്രിക്കറ്റ് ടീമിൽ രണ്ട് വനിത ഉണ്ടായിരിക്കും. ഫുട്ബാൾ മത്സരം 28ന് രാവിലെ ഒമ്പതിന് നെഹ്റു സ്​റ്റേഡിയത്തിലാണ് നടക്കുക. മാപ്പിളപ്പാട്ട്, തിരുവാതിര, ഒപ്പന (പുരുഷന്മാർ, സ്ത്രീകൾ), ഓട്ടൻതുള്ളൽ, സിനിമാറ്റിക് ഡാൻസ്, നാടോടിനൃത്തം, മൂകാഭിനയം, ഏകാങ്കനാടകം മത്സരങ്ങളാണ് ശനിയാഴ്ച നടന്നത്.