പാപ്പിയമ്മക്ക്​ ഇനി അന്തിയുറങ്ങാം, സുരക്ഷിതമായി

തലയോലപ്പറമ്പ്: പ്ലാസ്റ്റിക് ഷീറ്റ്​ വിരിച്ച ഷെഡിൽ തണുപ്പേറ്റ് തനിച്ചുതാമസിച്ചുവന്ന 98 കാരിക്ക് ഇനി സുരക്ഷിതഭവനത്തിൽ അന്തിയുറങ്ങാം. തലയോലപ്പറമ്പ് വടയാർ തേവലക്കാട് പാപ്പിയമ്മക്ക്​ ചെമ്മണ്ണൂർ ജ്വല്ലറി ഉടമ ബോബി ചെമ്മണ്ണൂരാണ് കുറ്റമറ്റ ഭവനം ഒരുക്കിനൽകിയത്. തനിച്ചുതാമസിക്കുന്ന പാപ്പിയമ്മയുടെ ജീവിതം അറിഞ്ഞ് തേവലക്കാട്ടെത്തിയ ബോബി പാപ്പിയമ്മക്ക്​ വീട്​ നിർമിച്ചുനൽകാമെന്ന് വാഗ്ദാനം ചെയ്തിരുന്നു. ഭൂമിയുടെ ഉടമസ്ഥാവകാശം സംബന്ധിച്ച സാങ്കേതിക തടസ്സങ്ങളടക്കം നീക്കാൻ കൂടുതൽ സമയം വേണ്ടിവന്നതിനാലാണ് വീട്​ നിർമാണം വൈകിയത്. ആറുമാസം വെള്ളക്കെട്ടിലമരുന്ന തേവലക്കാട്ടിൽ വെള്ളപ്പൊക്കത്തെ അതിജീവിക്കുന്ന വീടാണ് പാപ്പിയമ്മക്കായി ഒരുക്കിയത്. വീട്ടുപരിസരത്ത് വെള്ളം പൊങ്ങിയാൽ വീടിന്‍റെ അടിഭാഗത്തായി ഉറപ്പിച്ചിട്ടുള്ള വീപ്പകൾ വീടിനെ ഉയർത്തിനിർത്തും. 200 ചതുരശ്ര അടിയിൽ തീർത്ത വീടിന് 2.75 ലക്ഷം രൂപയാണ് ചെലവ്​. തലയോലപ്പറമ്പ് പഞ്ചായത്ത് വൈസ് പ്രസിഡന്‍റ്​ അനിൽ ചെള്ളാങ്കലിന്‍റെ അധ്യക്ഷതയിൽ നടന്ന യോഗത്തിൽ ബോബി ചെമ്മണ്ണൂർ വീടിന്‍റെ താക്കോൽ പാപ്പിയമ്മക്ക്​ കൈമാറി. സി.കെ. ആശ എം.എൽ.എ മുഖ്യപ്രഭാഷണം നടത്തി. ബ്ലോക്ക് പഞ്ചായത്ത് അംഗം ശ്രുതി ദാസ്, പഞ്ചായത്ത് അംഗങ്ങളായ എം.ടി. ജയമ്മ, സേതുലക്ഷ്മി അനിൽകുമാർ, കെ. ആശിഷ്, കോൺഗ്രസ് തലയോലപ്പറമ്പ് ബ്ലോക്ക് വൈസ് പ്രസിഡന്‍റ്​ എം. അനിൽകുമാർ, ബോബി ചെമ്മണ്ണൂർ ഗ്രൂപ് പി.ആർ.ഒ എം.ജെ. ജോജി, തിലകൻ, തേവലക്കാട് കലാസന ആർട്സ്​ ആൻഡ്‌ സ്പോർട്സ്​ ക്ലബ് സെക്രട്ടറി മനീഷ്, ക്ലബ് പ്രസിഡന്‍റ്​ എൻ.പി. ഷാൻ തുടങ്ങിയവർ പ​ങ്കെടുത്തു. പടം: ktl paappiyamma തലയോലപ്പറമ്പ് വടയാർ തേവലക്കാട്ട് പാപ്പിയമ്മക്ക്​ നിർമിച്ചുനൽകിയ വീടിന്‍റെ താക്കോൽ ബോബി ചെമ്മണ്ണൂർ കൈമാറുന്നു