പൊലീസിലെ അഴിച്ചുപണിയിൽ ദുരൂഹത -വി.ഡി. സതീശൻ

കോട്ടയം: നടിയെ ആക്രമിച്ച കേസിലെ അന്വേഷണ ഉദ്യോഗസ്ഥനെ മാറ്റിയതിൽ ദുരൂഹതയുണ്ടെന്ന്​ പ്രതിപക്ഷ നേതാവ്​ വി.ഡി. സതീശൻ. മുഖ്യമന്ത്രിയുടെ പൊളിറ്റിക്കല്‍ സെക്രട്ടറിയായി പി. ശശി ചുമതലയേറ്റതിന്​ പിന്നാലെയാണ്​ പൊലീസിലെ മാറ്റം. എന്തിന്‍റെ അടിസ്ഥാനത്തിലാണിതെന്ന്​ സർക്കാർ വിശദീകരിക്കണം. മാറ്റത്തിന്​ പിന്നിലെ വിവരങ്ങള്‍ പുറത്തുവരേണ്ടതുണ്ടെന്നും അദ്ദേഹം മാധ്യമപ്രവർത്തകരോട്​ പറഞ്ഞു. വീടിന് തൊട്ടടുത്ത് നടക്കുന്ന ബോംബ് നിര്‍മാണംപോലും നിയന്ത്രിക്കാന്‍ മുഖ്യമന്ത്രിക്ക്​ ക​ഴിയുന്നില്ല. പുതിയ എല്‍.ഡി.എഫ് കണ്‍വീനര്‍ ചുമതല ഏറ്റെടുത്ത ഉടൻ യു.ഡി.എഫില്‍ കുഴപ്പമുണ്ടാക്കാനുള്ള ശ്രമവുമായി വന്നു. യു.ഡി.എഫ് കക്ഷികളുടെ പിന്നാലെ നടന്ന് നാണംകെട്ടു. യു.ഡി.എഫിന്‍റെ അടിത്തറ കൂടുതല്‍ വിപുലീകരിക്കും. സില്‍വര്‍ ലൈന്‍ കല്ലിടലുമായി ഒരിഞ്ച് മുന്നോട്ടുനീങ്ങാന്‍ അനുവദിക്കില്ല. ഭീഷണികള്‍ക്കു മുന്നില്‍ മുട്ടുമടക്കില്ലെന്നും സതീശൻ പറഞ്ഞു.