കെ.എസ്.ആർ.ടി.സി ബസും ബൈക്കും കൂട്ടിയിടിച്ച്​ യുവാവിന് പരിക്ക്​

വൈക്കം: കെ.എസ്.ആർ.ടി.സി സൂപ്പർ ഫാസ്റ്റ് ബസും ബൈക്കും കൂട്ടിയിടിച്ചുണ്ടായ അപകടത്തിൽ ബൈക്ക് യാത്രികനായ യുവാവിന് പരിക്കേറ്റു. അപകടത്തിൽ പരിക്കേറ്റ ഇടുക്കി സ്വദേശി ശ്രീജിത് സന്തോഷിനെ (22) ചെമ്മനാകരിയിലെ സ്വകാര്യ ആശുപത്രിയിൽ പ്രവേശിപ്പിച്ചു. കഴിഞ്ഞദിവസം ചെമ്പ് കൊച്ചങ്ങാടിയിലായിരുന്നു അപകടം. എറണാകുളം ഭാഗത്തുനിന്ന്​ വൈക്കത്തേക്കുവന്ന സൂപ്പർ ഫാസ്റ്റ് ബസുമായി അതേദിശയിൽ നിന്നുവന്ന ബൈക്ക് കൂട്ടിയിടിക്കുകയായിരുന്നു. ബൈക്ക് നിയന്ത്രണം തെറ്റിയതിനെ തുടർന്ന് യുവാവ് ബൈക്കിൽനിന്ന് തെറിച്ചുവീഴുകയും ചെയ്തു. പ്രദേശത്തെ സി.സി ടി.വി കാമറകൾ പരിശോധിച്ച് അപകടമുണ്ടായതെങ്ങനെയെന്ന് കണ്ടെത്തുമെന്ന് പൊലീസ് പറഞ്ഞു.