ജനറൽ ആശുപത്രിയിലെ ട്രാൻസ്​ഫോർമർ കത്തിനശിച്ചു

കോട്ടയം: ജനറൽ ആശുപത്രിയിലെ ഹൈടെൻഷൻ ട്രാൻസ്​ഫോർമർ കത്തിനശിച്ചു. വ്യാഴാഴ്ച ഉച്ചക്ക്​ 2.45നാണ്​ സംഭവം. ആശുപ​ത്രിയിലെ 250 കെ.വി ഹൈടെൻഷൻ ട്രാൻസ്ഫോർമറിൽനിന്ന്​ തീയും പുകയും കണ്ടതോടെയാണ്​ സംഭവം ശ്രദ്ധയിൽപെട്ടത്​. ഉടൻ അഗ്​നിരക്ഷാസേനയെ വിവരമറിയിച്ചു. അവരെത്തിയാണ്​ തീയണച്ചത്​. ട്രാൻസ്​ഫോർമർ സ്ഥാപിച്ച കെട്ടിടത്തിന്​ കേടുപാടുകൾ സംഭവിച്ചിട്ടില്ല. അധികലോഡ്​ വന്നതാവാം കാരണമെന്നു കരുതുന്നു. ഇതോടെ ആശുപത്രിയിലെ വൈദ്യുതി ബന്ധം തടസ്സപ്പെട്ടു. ജനറേറ്റർ ഉപയോഗിച്ചാണ്​ നിലവിൽ പ്രവർത്തിക്കുന്നത്​. 250 കെ.വിയുടെ ജനറേറ്ററാണ്​ ആശുപത്രിയിലുള്ളത്​. ഇത്​ തുടർച്ചയായി പ്രവർത്തിച്ചാൽ ആറുമണിക്കൂർ നിർത്തിവെക്കണം. ആ സമയത്ത്​ പ്രവർത്തിപ്പിക്കാനായി വാടകക്ക്​ രണ്ട്​ 250 കെ​.വി ജനറേറ്റർകൂടി മൂന്നുദിവസത്തേക്ക്​ എത്തിച്ചതായി ആ​ശുപത്രി സൂപ്രണ്ട്​ ഡോ. ബിന്ദുകുമാരി അറിയിച്ചു. പൊതുമരാമത്ത്​ ഇലക്​ട്രിക്കൽ വിഭാഗം ഉദ്യോഗസ്ഥരും സ്ഥലത്തെത്തിയിരുന്നു. കത്തിനശിച്ച ജനറേറ്ററിനു പകരം പുതിയത്​ സ്ഥാപിക്കണം. ഇതിന്​ ഒന്നര മാസം താമസമെടുക്കും. അതുവരെ വാടകക്ക്​ ട്രാൻസ്​ഫോർമർ വാങ്ങിവെക്കാനാണ്​ തീരുമാനം. അതിനും മൂന്നുദിവസമെടുക്കും. പുതിയ ട്രാൻസ്ഫോർമർ സ്ഥാപിക്കുന്നതിന്​ 12 ലക്ഷം ചെലവുവരും. പുതിയ ഓക്സിജൻ പ്ലാന്‍റ്​ കൂടി പ്രവർത്തിക്കാവുന്ന വിധത്തിലായിരിക്കും ട്രാൻസ്​ഫോർമർ സ്ഥാപിക്കുക. ഇതിന്‍റെ എസ്റ്റിമേറ്റ്​ വെള്ളിയാഴ്​ച ഇലക്​ട്രിക്കൽ വിഭാഗം നൽകും.