പീഡാനുഭവസ്മരണയിൽ ഇന്ന് ദുഃഖവെള്ളി

കോട്ടയം: ക്രിസ്തുവിന്‍റെ പീഡാനുഭവസ്മരണയിൽ ക്രൈസ്തവർ ഇന്ന് ദുഃഖവെള്ളി ആചരിക്കും. ഗോഗുല്‍ത്താമലയിലേക്ക് കുരിശുമായി പീഡനങ്ങള്‍ സഹിച്ച് യേശു നടത്തിയ യാത്രയുടെയും അതിനുശേഷമുള്ള കുരിശുമരണത്തിന്‍റെയും ഓര്‍മ പുതുക്കുന്നതാണ്​ ദുഃഖവെള്ളി. പകൽ മുഴുവൻ നീളുന്ന പ്രാർഥനാചടങ്ങുകൾ ദേവാലയങ്ങളിലുണ്ടാകും. കുരിശിന്‍റെ വഴി, സ്ലീബാ വന്ദനം, പ്രദക്ഷിണം ഉൾപ്പെടെ ​​ചടങ്ങുകൾ മണിക്കൂറുകൾ നീളും. പ്രധാന ദേവാലയങ്ങളിൽ മെത്രാപ്പോലീത്തമാർ ദുഃഖവെള്ളി ശുശ്രൂഷകൾക്ക്​ മുഖ്യകാർമികത്വം വഹിക്കും. ചടങ്ങുകൾക്കുശേഷം നേർച്ചക്കഞ്ഞി വിതരണവുമുണ്ടാകും. പെസഹ നിറവിലായിരുന്നു ദുഃഖവെള്ളി ആചരണം. യേശുവിന്‍റെ അന്ത്യ അത്താഴത്തിന്‍റെ ഓർമ പുതുക്കി വ്യാഴാഴ്ച ക്രൈസ്തവർ പെസഹ ആചരിച്ചിരുന്നു. ശിഷ്യന്മാരുടെ കാൽ കഴുകി അവർക്കൊപ്പം അത്താഴം കഴിച്ചതിന്‍റെ ഓർമപുതുക്കലിനൊപ്പം കുർബാന സ്ഥാപിച്ചതിന്‍റെ അനുസ്മരണം കൂടിയാണ്​ പെസഹ. ഇതിന്‍റെ ഭാഗമായി ദേവാലയങ്ങളില്‍ കാല്‍കഴുകല്‍ ശുശ്രൂഷയും അപ്പംമുറിക്കലും നടന്നു. ബുധനാഴ്ച രാത്രിയിലും വ്യാഴാഴ്ചയുമായിട്ടായിരുന്നു പല ദേവാലയങ്ങളിലും തിരുക്കർമങ്ങൾ. വ്യാഴാഴ്ച രാത്രി വീടുകളിലും അപ്പം മുറിച്ചു. പ്രത്യേകം തയാറാക്കിയ പെസഹ അപ്പം (ഇൻഡ്രിയപ്പം) വീട്ടിലെ ഏറ്റവും മുതിർന്നയാൾ മുറിച്ച്​ മറ്റുള്ളവർക്കെല്ലാം പങ്കിട്ട്​ നൽകി. ഓശാന ദിനം ദേവാലയങ്ങളിൽനിന്ന്​ വിതരണം ചെയ്ത കുരുത്തോല കുരിശിന്‍റെ ആകൃതിയിൽ അപ്പത്തിന്​ മുകളിൽ വെക്കും. ഇതാണ്​ മുറിച്ച്​ പങ്കിടുന്നത്​. പുളിപ്പില്ലാത്ത പെസഹ അപ്പത്തിനൊപ്പം പാലും (കുറുക്ക്​) വീടുകളിൽ തയാറാക്കിയിരുന്നു. കോവിഡ്​​ തീർത്ത രണ്ടുവർഷത്തെ ഇടവേളക്കുശേഷമായിരുന്നു പെസഹയെന്നതിനാൽ പല ദേവാലയങ്ങളും തിങ്ങിനിറഞ്ഞിരുന്നു.