സതീശനെ സ്വീകരിച്ച്​ കാപ്പൻ

കോട്ടയം: കെ-റെയിൽ വിരുദ്ധ ജനകീയ സദസ്സ്​​ ഉദ്​ഘാടനം ചെയ്യാനെത്തിയ പ്രതിപക്ഷ നേതാവ്‌ വി.ഡി. സതീശനെ ഷാൾ അണിയിച്ച്​ സ്വീകരിച്ച്​ മാണി സി.കാപ്പൻ. യു.ഡി.എഫിൽ അവഗണന നേരിടുന്നുവെന്നും സതീശനോട്​ പരാതിപ്പെട്ടിട്ടും നടപടിയില്ലെന്നും കഴിഞ്ഞദിവസം കാപ്പൻ തുറന്നടിച്ചിരുന്നു. ഇതിനുപിന്നാലെയാണ്​ കോട്ടയത്ത്​ നടന്ന ജനകീയ സദസ്സിന്‍റെ വേദിയിൽ ഇരുവരും നേരിൽ കണ്ടത്​. വേദിയിലേക്ക്​ എത്തിയ സതീശനെ കാപ്പൻ ഷാൾ അണിയിച്ച്​ സ്വീകരിച്ചു. തുടർന്ന്​ ഇരുവരും അൽപനേരം സംസാരിക്കുകയും ചെയ്തു. പിന്നാലെ​ മറ്റൊരു പരിപാടിയുള്ളതിനാൽ മടങ്ങുകയാണെന്ന്​ വ്യക്​തമാക്കി ​വി.ഡി. സതീശന്‍റെ പ്രസംഗം കേൾക്കാൻ നിൽക്കാതെ മാണി.സി.കാപ്പൻ എം.എൽ.എ വേദിവിട്ടു. വേഗത്തിൽ മടങ്ങണമെന്ന്​ വ്യക്​തമാക്കി ആദ്യം കാപ്പൻ പ്രസംഗിച്ചിരുന്നു. മടങ്ങുന്നതിനിടെ മാധ്യമപ്രവർത്തകരുടെ ചോദ്യത്തിന്​ യു.ഡി.എഫിൽ തൃപ്തനാണെന്നും പ്രശ്നങ്ങൾ അവസാനിച്ചെന്നും അദ്ദേഹം പറഞ്ഞു. കാപ്പനുമായിട്ടുണ്ടായത്​ 'കമ്യൂണിക്കേഷൻ ഗ്യാപ്പ്‌' മാത്രമാണെന്നായിരുന്നു സതീശന്‍റെ പ്രതികരണം. കാപ്പനുമായി ഫോണിൽ സംസാരിച്ചിരുന്നതായും അടുത്ത ദിവസം നേരിൽ ചർച്ച നടത്തുമെന്നും അദ്ദേഹം പറഞ്ഞു.