ജില്ലയിലെ അഞ്ച്​ റോഡിന്​ പുതുമുഖം; മുഖ്യമന്ത്രി നാടിന്​ സമർപ്പിച്ചു

കോട്ടയം: സർക്കാറിന്‍റെ ഒന്നാം വാർഷികാഘോഷങ്ങളുടെ ഭാഗമായി 100ദിന കർമപദ്ധതിയിൽ ഉൾപ്പെടുത്തി നവീകരിച്ച ജില്ലയിലെ അഞ്ച്​ റോഡിന്‍റെ ഉദ്ഘാടനം മുഖ്യമന്ത്രി പിണറായി വിജയൻ നിർവഹിച്ചു. ബി.എം ആൻഡ് ബി.സി നിലവാരത്തിൽ നവീകരിച്ച കാരിത്താസ്-അമ്മഞ്ചേരി, കരിക്കാട്ടൂർ-മുക്കട, മണർകാട്-കിടങ്ങൂർ, കോട്ടയം ലോവർ ബസാർ(ബേക്കർ ജങ്​ഷൻ-ഇല്ലിക്കൽ), കാണക്കാരി-തോട്ടുവ റോഡുകളുടെ ഉദ്ഘാടനമാണ് മുഖ്യമന്ത്രി ഓൺലൈനായി നിർവഹിച്ചത്. പൊതുമരാമത്ത് മന്ത്രി പി.എ. മുഹമ്മദ് റിയാസ് അധ്യക്ഷത വഹിച്ചു. കാരിത്താസ്-അമ്മഞ്ചേരി റോഡ് ഉദ്ഘാടനത്തോടനുബന്ധിച്ച് അമ്മഞ്ചേരി ജങ്​ഷനിൽ നടന്ന ചടങ്ങിൽ മന്ത്രി വി.എൻ. വാസവൻ ഓൺലൈനായി ഫലകം അനാച്ഛാദനം ചെയ്തു. കാരിത്താസ്- അമ്മഞ്ചേരി റോഡിന്‍റെ നിർമാണം പൂർണമാകണമെങ്കിൽ മേൽപാലത്തിന്‍റെ പണികൂടി പൂർത്തീകരിക്കേണ്ടതുണ്ടെന്നും ഇതിന്‍റെ സാങ്കേതിക തടസ്സങ്ങൾ നീക്കി ഉടൻ ജനങ്ങൾക്ക് സമർപ്പിക്കുമെന്നും മന്ത്രി പറഞ്ഞു. പൊതുമരാമത്ത് വകുപ്പ് റോഡ്സ് വിഭാഗം എക്സിക്യൂട്ടിവ് എൻജിനീയർ പി. ശ്രീലേഖ റിപ്പോർട്ട് അവതരിപ്പിച്ചു. എം.സി റോഡിൽ കാരിത്താസ് ജങ്​ഷനിൽനിന്ന് ആരംഭിച്ച് ആർപ്പൂക്കര അമ്മഞ്ചേരി ജങ്​ഷൻ വരെയുള്ള 1.60 കി.മീ. റോഡ് ഏഴു മീറ്റർ ക്യാരേജ് വേയോടെ 2.24 കോടി രൂപ ചെലവിലാണ് നവീകരിച്ചത്. കരിക്കാട്ടൂർ-മുക്കട റോഡിന്റെ ഉദ്ഘാടനത്തോടനുബന്ധിച്ച് കരിക്കാട്ടൂരിൽ നടന്ന ചടങ്ങിൽ സർക്കാർ ചീഫ് വിപ്പ് ഡോ. എൻ. ജയരാജ് ഫലകം അനാച്ഛാദനം ചെയ്തു. പുനലൂർ-മൂവാറ്റുപുഴ ഹൈവേയിൽ കരിക്കാട്ടൂർ ജങ്​ഷനിൽനിന്ന് പൊന്തൻപുഴയിലൂടെ മുക്കടയിൽ അവസാനിക്കുന്ന 2.4 കി.മീ. റോഡാണ് അഞ്ചുമീറ്റർ വീതിയിൽ 1.94 കോടി രൂപ ചെലവിൽ നവീകരിച്ചത്. കോട്ടയം നിയോജക മണ്ഡലത്തിലെ ബേക്കർ ജങ്​ഷൻ-ഇല്ലിക്കൽ ലോവർ ബസാർ റോഡിന്‍റെ ഉദ്ഘാടനത്തോടനുബന്ധിച്ച് അറുത്തൂട്ടി ജങ്​ഷനിൽ നടന്ന ചടങ്ങിൽ തിരുവഞ്ചൂർ രാധാകൃഷ്ണൻ എം.എൽ.എ ശിലാഫലകം അനാച്ഛാദനം ചെയ്തു. കോട്ടയം ബേക്കർ ജങ്​ഷൻ മുതൽ ഇല്ലിക്കൽ വരെയുള്ള 4.12 കി.മീ. ലോവർ ബസാർ റോഡാണ് ആധുനികരീതിയിൽ 6.08 കോടി ചെലവിൽ നവീകരിച്ചത്. പുതുപ്പള്ളി നിയോജക മണ്ഡലത്തിലെ മണർകാട്-കിടങ്ങൂർ റോഡിന്റെ ഉദ്ഘാടനത്തോടനുബന്ധിച്ച് അയർക്കുന്നം ബസ് സ്റ്റാൻഡിൽ നടന്ന പൊതുസമ്മേളനത്തിൽ ജില്ല പഞ്ചായത്ത്​ അംഗം റെജി എം. ഫിലിപ്പോസ് ഫലകം അനാച്ഛാദനം ചെയ്തു. കാണക്കാരി-തോട്ടുവ റോഡിന്‍റെ ഉദ്ഘാടനത്തോടനുബന്ധിച്ച് തോട്ടുവയിൽ നടന്ന ചടങ്ങിൽ മോൻസ് ജോസഫ് എം.എൽ.എ ശിലാഫലകം അനാച്ഛാദനം ചെയ്തു. പടം KTL KARIKKATTOOR MUKKADA കരിക്കാട്ടൂർ-മുക്കട റോഡിന്‍റെ ഉദ്ഘാടനത്തോടനുബന്ധിച്ച് കരിക്കാട്ടൂരിൽ നടന്ന ചടങ്ങിൽ സർക്കാർ ചീഫ് വിപ്പ് ഡോ. എൻ. ജയരാജ് ഫലകം അനാച്ഛാദനം ചെയ്യുന്നു