നിരത്തുകൾ സജീവമായപ്പോൾ ഗതാഗതക്കുരുക്ക്​

കോട്ടയം: ദ്വിദിന പണിമുടക്കിനുശേഷം നിരത്തുകൾ സജീവമായ ബുധനാഴ്ച കോട്ടയം നഗരത്തിലടക്കം വൻ ഗതാഗതക്കുരുക്ക്​. രാവിലെ പലയിടത്തും മണിക്കൂറുകളോളം വാഹനങ്ങൾ കുടുങ്ങി. എം.സി റോഡിൽ മണിപ്പുഴ, സിമന്‍റ്​ കവല, നാട്ടകം എന്നിവിടങ്ങളിൽ രാവിലെ രൂക്ഷമായ ഗതാഗതക്കുരുക്കാണ്​ അനുഭവപ്പെട്ടത്​. ദീർഘദൂര ബസുകളടക്കം ഇതിൽ കുടുങ്ങി. കാറുകളടക്കമുള്ളവ വാഹനങ്ങളും ഇ​ഴഞ്ഞിഴഞ്ഞാണ്​ നീങ്ങിയത്​. വിവിധ ട്രേഡ് യൂനിയനുകളുടെ നേതൃത്വത്തിൽ രണ്ടുദിനങ്ങളായി നടന്നിരുന്ന പണിമുടക്കിൽ നഗര-ഗ്രാമവീഥികൾ തിരക്കൊഴിഞ്ഞ നിലയിലായിരുന്നു. ഇതിനുപിന്നാലെ ബുധനാഴ്ച ജില്ല ചലിച്ചുതുടങ്ങിയപ്പോഴായിരുന്നു 'സ്തംഭനം'. സ്വകാര്യ ബസുകളും പണിമുടക്ക് പിൻവലിച്ച് നിരത്തിലിറങ്ങിയതോടെ കുരുക്ക് വർധിച്ചു. നഗരത്തിന്‍റെ വിവിധ ഭാഗങ്ങളായ പുളിമൂട് ജങ്​ഷൻ, ബേക്കർ ജങ്​ഷൻ, നാഗമ്പടം പാലം, കഞ്ഞിക്കുഴി, കലക്ടറേറ്റ്​, മണർകാട്, മാർക്കറ്റ് തുടങ്ങിയ ഇടങ്ങളിലും കുരുക്ക് രൂക്ഷമായിരുന്നു. പലയിടത്തും വാഹനങ്ങളുടെ നീണ്ട നിരയായിരുന്നു. കൂടുതൽ സ്വകാര്യ വാഹനങ്ങൾ നിരത്തിലിറങ്ങിയതുമാണ് കുരുക്കിനിടയാക്കിയത്​. അവധിക്കുശേഷം ഉദ്യോഗസ്ഥരടക്കമുള്ളവർ കാറുകളിൽ ഓഫിസുകളിലേക്ക്​ എത്തിയതോടെ റോഡുകൾ വാഹനങ്ങളാൽ നിറയുകയായിരുന്നു. വൻ കുരുക്ക്​ രൂപപ്പെട്ടില്ലെങ്കിലും ഉച്ചക്കും ഗതാഗതസ്തംഭനം തുടർന്നു. കഞ്ഞിക്കുഴി മുതൽ കലക്ടറേറ്റ് വരെ വലിയ കുരുക്കാണ് അനുഭവപ്പെട്ടത്​.