റബർ ഗവേഷണ കേന്ദ്രത്തിൽ മോളിക്യുലാർ പ്ലാന്‍റ്​ പത്തോളജി ലബോറട്ടറി

കോട്ടയം: റബർ ഗവേഷണകേന്ദ്രത്തിൽ (ആർ.ആർ.ഐ.ഐ) മോളിക്യുലാർ പ്ലാന്‍റ്​ പത്തോളജി ലബോറട്ടറി തുറന്നു. ആധുനിക സൗകര്യത്തോടെയുള്ള ലബോറട്ടറി റബർ ബോർഡ് എക്സിക്യൂട്ടിവ് ഡയറക്ടർ ഡോ. കെ.എൻ. രാഘവൻ ഉദ്ഘാടനം ചെയ്തു. രോഗപ്രതിരോധവുമായി ബന്ധപ്പെട്ട ഗവേഷണങ്ങൾക്ക്​ ഇത്​ വേഗം നൽകുമെന്ന്​ അദ്ദേഹം പറഞ്ഞു. 1955 മുതൽ പത്തോളജി ഡിവിഷൻ ഇന്ത്യൻ റബർ ഗവേഷണ കേന്ദ്രത്തിൽ പ്രവർത്തിച്ചുവരുന്നുണ്ട്​. പുതിയ ലബോറട്ടറിയിൽ പ്ലാന്‍റ്​ പത്തോളജിയിലെ ഉയർന്നതലത്തിലുള്ള ഗവേഷണങ്ങൾക്ക് ആവശ്യമായ റിയൽ ടൈം പി.സി.ആർ മെഷീൻ, ഹൈ സ്​പീഡ് സെൻട്രിഫ്യൂജ് മെഷീൻ, ജെൽ ഡോക്കുമെന്‍റേഷൻ സിസ്റ്റം തുടങ്ങി ഒട്ടേറെ സൗകര്യമുണ്ട്. ഡോ. എം.ഡി. ജെസി, പി. സുധ, ഡോ. ഷാജി ഫിലിപ്പ് എന്നിവർ സംസാരിച്ചു. രോഗാണുക്കളെയും രോഗങ്ങളെയും കൃത്യമായി നിരീക്ഷിക്കുന്നതിനൊപ്പം രോഗപ്രതിരോധശേഷിക്ക്​ കാരണമാകുന്ന ജീനുകൾ കണ്ടെത്തി ജനിതകമാറ്റം വരുത്തിയ റബർമരങ്ങളിൽ സംയോജിപ്പിക്കുന്നതിനുള്ള ഗവേഷണങ്ങളാണ്​ ഇവിടെ നടക്കുന്നത്​. അനുകൂലഗുണങ്ങളുള്ള മികച്ച ചെടിയെ കണ്ടെത്തുന്നതിനുള്ള മാർക്കർ അസിസ്റ്റഡ് സെലക്ഷൻ, ചെലവുകുറഞ്ഞ ജൈവനിയന്ത്രണവുമായി ബന്ധപ്പെട്ട ഗവേഷണങ്ങൾ, പട്ടമരവുമായി ബന്ധപ്പെട്ട പഠനങ്ങൾ എന്നിവക്കെല്ലാം അഡ്വാൻസ്​ഡ് മോളിക്യുലാർ പ്ലാന്‍റ്​ പത്തോളജി ലബോറട്ടറി സഹായിക്കുമെന്ന്​ ഗവേഷണകേന്ദ്രം അധികൃതർ പറഞ്ഞു. KTG RUBBER അഡ്വാൻസ്​ഡ് മോളിക്യുലാർ പ്ലാന്‍റ്​ പത്തോളജി ലബോറട്ടറിയുടെ ഉദ്​ഘാടനം ഡോ. കെ.എൻ. രാഘവൻ നിർവഹിക്കുന്നു