കുഴിയിൽവീണ പശുവിനെ അഗ്​നി​രക്ഷാസേന രക്ഷപ്പെടുത്തി

കോട്ടയം: മാലിന്യക്കുഴിയിൽ വീണ പശുവിനെ അഗ്​നിരക്ഷാസേന രക്ഷപ്പെടുത്തി. അകലക്കുന്നം കിഴക്കയിൽ ജോമോൻ പീറ്ററിന്‍റെ പശുവാണ് കുഴിയിൽ വീണത്. തിങ്കളാഴ്ച രാവിലെ 11ഓടെയാണ് സംഭവം. വ്യാപാരസ്ഥാപനങ്ങളിലെയും മത്സ്യങ്ങളുടെയും മാലിന്യങ്ങൾ നിക്ഷേപിക്കുന്ന കുഴിയാണിത്. കുഴിയിൽ ഏഴടിയോളം മലിനജലവും നിറഞ്ഞിരുന്നു. വിവരമറിഞ്ഞ് പാമ്പാടി അഗ്​നിരക്ഷാസേന സ്ഥലത്തെത്തി. എഫ്.ആർ.ഒ സെൻകുമാർ കുഴിയിലിറങ്ങി ഹോസ്​ ഇട്ടും കുഴിയുടെ സൈഡ് വെട്ടിയിറക്കിയും പശുവിനെ കരക്കെത്തിച്ചു. ഗ്രേഡ് എസ്.ടി.ഒ ഹക്കീം, ജയകുമാർ, സന്ദീപ്, സുൽഫി, ബിനീഷ്, ജിജി, ഹോംഗാർഡ് ബിനുകുമാർ എന്നിവർ നേതൃത്വം നൽകി.