മകനെയും കുടുംബത്തെയും തീകൊളുത്തി കൊന്ന സംഭവം: പ്രതിയെ പൊലീസ് കസ്റ്റഡിയില്‍ വാങ്ങി

തൊടുപുഴ: ഉറങ്ങിക്കിടന്ന മകനെയും മരുമകളെയും രണ്ട്​ കൊച്ചുമക്കളെയും പെട്രോളൊഴിച്ച് തീകൊളുത്തി കൊലപ്പെടുത്തിയ സംഭവത്തില്‍ പ്രതി ഉടുമ്പന്നൂര്‍ ചീനിക്കുഴി ആലിയക്കുന്നേല്‍ ഹമീദിനെ (79) പൊലീസ് കസ്റ്റഡിയില്‍ വാങ്ങി. ഇയാളുടെ മകന്‍ മുഹമ്മദ് ഫൈസല്‍ (ഷിബു- 45), ഭാര്യ ഷീബ (40), പെണ്‍മക്കളായ മെഹ്‌റിന്‍ (16), അസ്​ന (13) എന്നിവരെയാണ് കൊലപ്പെടുത്തിയത്. കഴിഞ്ഞ 18ന് അർധരാത്രിയിലാണ് സംഭവം. സ്വത്ത് സംബന്ധമായ തര്‍ക്കമാണ് കൊലപാതകത്തിന് കാരണം. പ്രതി ഹമീദിനെ സംഭവ ദിവസം തന്നെ കരിമണ്ണൂര്‍ പൊലീസ് അറസ്റ്റ് ചെയ്ത്​ റിമാന്‍ഡ്​​ ചെയ്തിരുന്നു. മുട്ടം കോടതിയില്‍നിന്ന്​ പ്രതിയെ പ്രത്യേക അന്വേഷണസംഘമാണ് രണ്ടുദിവസത്തേക്ക് കസ്റ്റഡിയില്‍ വാങ്ങിയത്. കൊലപാതകത്തിന് ഉപയോഗിച്ച പെട്രോളിന്‍റെ ഉറവിടം സംബന്ധിച്ചും ഇതിനായി നടത്തിയ തയാറെടുപ്പിനെക്കുറിച്ചും കൂടുതല്‍ വിവരങ്ങള്‍ ശേഖരിക്കുന്നതിനായാണ്​ കസ്റ്റഡിയില്‍ വാങ്ങിയത്. ഇതിനുപുറമെ, സംഭവത്തിൽ ദൃക്‌സാക്ഷികള്‍ ഉള്‍പ്പെടെയുള്ളവരില്‍നിന്ന്​ ശേഖരിച്ച വിവരങ്ങളെക്കുറിച്ച് കൂടുതല്‍ വ്യക്തത വരുത്തേണ്ടതുമുണ്ട്​. സംഭവത്തിന് ശേഷം പൊലീസ് നിരവധിയാളുകളില്‍നിന്ന് മൊഴിയെടുത്തിരുന്നു. ആവശ്യമെങ്കില്‍ സംഭവം നടന്ന ചീനിക്കുഴിയിലെ വീട്ടില്‍ ഉള്‍പ്പെടെ എത്തിച്ച്​ തെളിവ് ശേഖരിക്കും. തൊടുപുഴ ഡിവൈ.എസ്.പി എ.ജി. ലാലിന്‍റെ നേതൃത്വത്തിലെ പ്രത്യേക സംഘമാണ് കേസ് അന്വേഷിക്കുന്നത്.