ചങ്ങനാശ്ശേരി ബോട്ട്‌ ജെട്ടിയിലെ വാട്ടര്‍ ടാക്‌സി മാറ്റാൻ നീക്കം

ചങ്ങനാശ്ശേരി: ബോട്ടുജെട്ടിയിലെ വാട്ടര്‍ടാക്‌സി മുഹമ്മക്ക്​ മാറ്റാൻ നീക്കം. വിനോദസഞ്ചാരികളെ ലക്ഷ്യമിട്ട്​ കഴിഞ്ഞ ആഗസ്​റ്റിലാണ് വാട്ടര്‍ ടാക്‌സി സർവിസിന്​ ചങ്ങനാശ്ശേരി ബോട്ടുജെട്ടിയിൽ തുടങ്ങിയത്​. പ്രതിമാസം ഒരുലക്ഷം രൂപവരെ വരുമാനമുണ്ടായിരുന്നു​. ശനി, ഞായർ ദിവസങ്ങളിൽ നിരവധിപേർ വാട്ടര്‍ടാക്‌സി യാത്ര ആസ്വദിക്കാൻ എത്തിയിരുന്നു. എന്നാൽ, കോവിഡ് രണ്ടാം തരംഗത്തില്‍ വരുമാനത്തിൽ കുറവ് വന്നു. ഇതിനിടെയാണ്​ ചങ്ങനാശ്ശേരിയിൽനിന്ന്​ സർവിസ്​ മാറ്റാൻ നീക്കം. കഴിഞ്ഞദിവസം വാട്ടര്‍ ടാക്‌സി ബുക്ക് ചെയ്യാൻ എത്തിയവരോട്​ രണ്ടുദിവസത്തിനുള്ളില്‍ വാട്ടര്‍ ടാക്‌സി മുഹമ്മക്ക്​ മാറ്റുമെന്ന്​ അധികൃതർ അറിയിക്കുകയായിരുന്നു. ഇതുസംബന്ധിച്ച നിർദേശം ട്രാഫിക് സൂപ്രണ്ട് കഴിഞ്ഞദിവസം ചങ്ങനാശ്ശേരി സ്​റ്റേഷന്‍ മാസ്റ്റര്‍ക്ക് നല്‍കിയതായാണ്​ വിവരം. വാട്ടര്‍ടാക്‌സി ആരംഭിച്ചതോടെ ചങ്ങനാശ്ശേരി ബോട്ടുജെട്ടി സജീവമായിരുന്നു. ഇത്​ നിലച്ചാൽ ജെട്ടിയുടെ പ്രവർത്തനത്തെ ബാധിക്കും. നിലവിൽ ഒരു ബോട്ട്​ സാധാരണ ബോട്ട്​ സർവിസ്​ മാത്രമാണ്​ ജെട്ടിയിൽനിന്നുള്ളത്​. നേരത്തേ രണ്ടു ബോട്ടുകളായിരുന്നു സര്‍വിസ് നടത്തിയിരുന്നത്. 2020 അവസാനത്തോടെ അപകടത്തെ തുടര്‍ന്നാണ് ഒന്നിന്‍റെ സര്‍വിസ് നിലച്ചത്. ഇത്​ അറ്റകുറ്റപ്പണിക്കായി ആലപ്പുഴ ഡോക്ക്​ യാര്‍ഡിലേക്ക്​ മാറ്റി. നിലവില്‍ ആലപ്പുഴയില്‍നിന്ന്​ രാവിലെ 7.30ന് ചങ്ങനാശ്ശേരിയിലെത്തുന്ന ബോട്ട് 7.45ന് കാവാലത്തിന് പുറപ്പെടും. ഇവിടെനിന്ന്​ 12.30ന് ചങ്ങനാശ്ശേരി ബോട്ട്​ജെട്ടിയിലെത്തുന്ന​ ബോട്ട്​ ആലപ്പുഴക്ക്​ പുറപ്പടും. ​നേരത്തേ രണ്ടുബോട്ട് സര്‍വിസുകള്‍ ഉള്ളപ്പോള്‍ ചങ്ങനാശ്ശേരിയില്‍നിന്ന്​ 9.15ന് ആലപ്പുഴക്കും തിരികെ ഒന്നിന് ചങ്ങനാശ്ശേരിക്കും സര്‍വിസ് നടത്തിയിരുന്നു. ഈ സര്‍വിസാണ് നിലച്ചത്. ഇത്​ കുട്ടനാടൻ മേഖലയിലേക്കുള്ള യാത്രക്കാർക്ക്​ ദുരിതമാണ്​ സമ്മാനിക്കുന്നത്​. ചങ്ങനാശ്ശേരി മാർക്കറ്റിലെത്താൻ പലരും ബോട്ടുകളെ ആശ്രയിക്കുന്ന സ്ഥിതിയുമുണ്ടായിരുന്നു. രണ്ട് ബോട്ടുകള്‍ സര്‍വിസ് നടത്തിയിരുന്നപ്പോള്‍ ശരാശരി 5000 രൂപ ദിവസവരുമാനം ലഭിച്ചിരുന്നു. ഇപ്പോള്‍ ഉള്ള ഒരു ബോട്ട് സര്‍വിസ് നടത്തുന്നുണ്ടെങ്കിലും 2000 രൂപ വരുമാനമേ ഇതില്‍നിന്ന്​ ലഭിക്കുന്നുള്ളൂവെന്നാണ് അധികൃതര്‍ പറയുന്നത്. മറ്റ് ജില്ലകളില്‍നിന്ന്​ ചങ്ങനാശ്ശേരി ബോട്ട് ജെട്ടിയിലെത്തി ജോലി ചെയ്യുന്ന ജീവനക്കാരും ഒരു ബോട്ട് സര്‍വിസ് നിലച്ചിതിനാല്‍ ദുരിതത്തിലാണ്. മറ്റ് സ്ഥലങ്ങളിലേക്ക് ഇവരെ ഡ്യൂട്ടിക്ക്​ അയക്കുകയാണ് ഇപ്പോള്‍ ചെയ്യുന്നത്. 24 ജീവനക്കാരാണ് ബോട്ട് ജെട്ടിയില്‍ ഉണ്ടായിരുന്നത്. KTL CHR 2 water Taxi ചങ്ങനാശ്ശേരി ബോട്ട് ജെട്ടിയിലെ വാട്ടര്‍ ടാക്‌സി