മൂലമറ്റം വെടിവെപ്പ്: തോക്ക് കമ്പനി നിർമിതം; ലൈസൻസില്ല

മൂലമറ്റം: ബസ് കണ്ടക്ടറെ വെടിവെച്ചുകൊന്ന സംഭവത്തിൽ പിടികൂടിയ തോക്ക് കമ്പനി നിർമിതമാണെങ്കിലും ലൈസൻസില്ലാത്തതെന്ന് പൊലീസ്. വിദഗ്​ധ സംഘം നടത്തിയ പരിശോധനയിലാണ് തോക്ക് കമ്പനി നിർമിതമാണെന്ന്​ കണ്ടെത്തിയത്. ഇത് താൻ 2014ൽ കരിങ്കുന്നം പ്ലാന്റേഷനിലുള്ള ഇരുമ്പ്​ പണിക്കാരന്‍റെ കൈയിൽനിന്ന്​ ഒരു ലക്ഷം രൂപക്ക്​ വാങ്ങിയതാണെന്ന്​ പ്രതി ഫിലിപ്പ് മാർട്ടിൻ പൊലീസിന്​ മൊഴി നൽകി. മൊഴിയുടെ അടിസ്ഥാനത്തിൽ കരിങ്കുന്നത്ത് എത്തിയ പൊലീസിന് ഇരുമ്പ്​ പണിക്കാരൻ മരിച്ചുപോയെന്ന വിവരമാണ്​ ലഭിച്ചത്​. ഒരേസമയം രണ്ടുതിര നിറക്കാവുന്ന ഡബിൾ ബാരൽ തോക്കാണ്​ കൊലപാതകത്തിന്​ ഉപയോഗിച്ചത്​. ഇയാൾക്ക് തോക്കിൽ നിറക്കാനുള്ള തിരകൾ എവിടെനിന്ന്​ ലഭിച്ചു എന്നതടക്കം കാര്യങ്ങൾ കണ്ടെത്തേണ്ടതുണ്ട്. ഇതേക്കുറിച്ച് പൊലീസ് അന്വേഷിച്ചുവരുകയാണ്. മുട്ടത്തുവെച്ച് ഫിലിപ്പിനെ കസ്റ്റഡിയിലെടുക്കുമ്പോൾ തോക്കിനുള്ളിൽ ലോഡ് ചെയ്ത നിലയിൽ രണ്ട്​ തിരയും വാഹനത്തിൽനിന്ന്​ ഒരു തിരയും കണ്ടെടുത്തിരുന്നു. ഒരു തിര അറക്കുളത്തുള്ള ഹോട്ടലിന് നേരെയും മറ്റൊന്ന് എ.കെ.ജി കവലയിൽ വെച്ചും പൊട്ടിച്ചു. നിറയൊഴിക്കുമ്പോൾ ചിതറിത്തെറിക്കുന്ന തരത്തിലുള്ള തിരയാണ് ഈ തോക്കിൽ ഉപയോഗിക്കുന്നത്. ആളുകൾ കൂടി നിൽക്കുന്ന സ്ഥലത്തുവെച്ച് വെടിവെച്ചാൽ കൂടുതൽ അപകടങ്ങൾക്ക് സാധ്യതയുണ്ട്. നായാട്ടിനായിട്ടാണ് ഈ തോക്ക് പ്രധാനമായും ഉപയോഗിക്കുന്നത്. TDG100 theliveduppu പ്രതി ഫിലിപ്പ്​ മാർട്ടിനെ സംഭവസ്ഥലത്ത്​ തെളിവെടുപ്പിന്​ എത്തിച്ചപ്പോൾ