സ്വകാര്യബസ്​ സമരം: പ്രതിദിന വരുമാനം ഏഴുകോടിയാക്കാൻ കെ.എസ്​.ആർ.ടി.സി

ഓർഡിനറികൾ കുറവ്​; സൂപ്പർക്ലാസുകൾ യാത്രക്കാരെ പിഴിയുന്നു കോട്ടയം: സ്വകാര്യബസ്​ സമര സാഹചര്യം മുതലെടുത്ത്​ പ്രതിദിന വരുമാനം ഏഴുകോടിയാക്കാൻ കെ.എസ്​.ആർ.ടി.സി മേധാവിയുടെ ആഹ്വാനം. ഇതുസംബന്ധിച്ച നിർദേശം കെ.എസ്​.ആർ.ടി.സി ചെയർമാനും മാനേജിങ്​ ഡയറക്ടറുമായ ബിജു പ്രഭാകർ ജീവനക്കാർക്ക്​ നൽകി. സ്വകാര്യബസ്​ സമരം അവസാനിപ്പിച്ച്​ ജനങ്ങളുടെ യാത്രക്ലേശം അവസാനിപ്പിക്കാൻ മുൻകൈയെടുക്കേണ്ട ഗതാഗത സെക്രട്ടറിയുടെ ചുമതലയും ബിജു പ്രഭാകറിന്​ തന്നെയാണ്​. എന്നാൽ, സ്വകാര്യബസുടമകളെ ചർച്ചക്കുപോലും വിളിക്കേണ്ടതില്ലെന്നാണ്​ വകുപ്പിന്‍റെ തീരുമാനം. സ്വകാര്യബസുകൾ സർവിസ് നടത്തിയിരുന്ന റൂട്ടുകളിൽ കെ.എസ്​.ആർ.ടി.സി ബസുകൾ ഇറക്കാൻ ജീവനക്കാർക്ക്​ അയച്ച കത്തിൽ ബിജു പ്രഭാകർ ആവശ്യപ്പെട്ടിട്ടുണ്ട്​. കഴിഞ്ഞ വെള്ളിയാഴ്ചയെക്കാൾ ഏതാണ്ട് 300ൽ അധികം ബസ്​ കൂടുതൽ ഓടിക്കാൻ കഴിഞ്ഞു. ഇത് നേട്ടമാണ്. കാര്യമായ മാറ്റം ഉണ്ടാക്കി ഏഴുകോടി രൂപ ലഭ്യമാക്കാൻ നമുക്ക് കഴിയുമെന്നും ശനിയാഴ്ച അയച്ച കത്തിൽ പറയുന്നു. വെള്ളിയാഴ്ച 3715 ബസാണ്​ കെ.എസ്​.ആർ.ടി.സി ഓടിച്ചത്​. 6.78 കോടി രൂപ​ വരുമാനം കിട്ടി. 12.18 ലക്ഷം കിലോമീറ്റർ സർവിസ്​ നടത്തി. കിലോമീറ്ററിന്​ ശരാശരി 55.66 രൂപയായിരുന്നു വരുമാനം. ഒരു ബസിന്​ ശരാശരി കിട്ടിയത്​ 18,256 രൂപയാണ്​. നിരത്തിലിറക്കാൻ കഴിയുന്ന അവസ്ഥയിലുള്ള 155 ബസ്​ ഈ ദിവസം ഓടിക്കാതെയിട്ടു. 543 എണ്ണം അറ്റകുറ്റപ്പണിക്കായി വർക്ക്​ഷോപ്പിലാണ്​. കെ.എസ്​.ആർ.ടി.സിക്ക്​ ആകെയുള്ള 6418 ബസിൽ ബാക്കിയുള്ളവ ഓടിക്കാനാവാത്ത സ്ഥിതിയിൽ പലയിടങ്ങളിൽ കൂട്ടിയിട്ടിരിക്കുന്നു​. നിലവിൽ ഓടിക്കുന്ന കെ.എസ്​.ആർ.ടി.സി ബസുകളിൽ ബഹുഭൂരിപക്ഷവും ഫാസ്റ്റും സൂപ്പർ ഫാസ്റ്റുമാണ്​. ഗ്രാമപ്രദേശങ്ങളിൽപോലും സാധാരണക്കാർ സൂപ്പർക്ലാസ്​ ബസുകളിൽ കയറി യാത്ര ചെയ്യണം​. 15 രൂപക്ക്​ സ്വകാര്യബസിൽ യാത്ര ചെയ്തിരുന്ന ദൂരം കെ.എസ്​.ആർ.ടി.സി സൂപ്പർക്ലാസിൽ 31 രൂപക്ക്​ പോകേണ്ട സ്ഥിതിയാണ്​. നേരത്തേ, മോ​ട്ടോർ വാഹന ചട്ടങ്ങൾ നോക്കുകുത്തിയാക്കി കെ.എസ്​.ആർ.ടി.സി നടത്തുന്ന സൂപ്പർക്ലാസ്​ സർവിസുകളുടെ പഴക്കം ഏഴിൽനിന്ന്​ ഒമ്പതുവർഷമായി ഉയർത്തിയിരുന്നു. ഇതോടെ ഏഴുവർഷത്തിനും ഒമ്പതുവർഷത്തിനും ഇടയിൽ പഴക്കമുള്ള 704 ബസ്​ ഫാസ്​റ്റ്​ പാസഞ്ചർ, സൂപ്പർ ഫാസ്​റ്റ്​, സൂപ്പർ എക്​സ്​പ്രസ്​, സൂപ്പർ ഡീലക്​സ്​ സർവിസുകൾക്ക്​ ഉപയോഗിക്കാവുന്ന സ്ഥിതിയായി. 2018ൽ വരുത്തിയ നിയമ ഭേദഗതിയിൽ എല്ലാ സൂപ്പർക്ലാസുകളുടെയും പഴക്കം ഏഴുവർഷമാക്കി നിജപ്പെടുത്തിയിരുന്നു. ഇതാണ്​ ഗതാഗത സെക്രട്ടറിയുടെ ഉത്തരവി​ന്‍റെ മാത്രം അടിസ്ഥാനത്തിൽ ഒമ്പതാക്കി ഉയർത്തിയത്​. സ്വകാര്യബസുകൾ പണിമുടക്കുമ്പോൾ വൻ തുക ഈടാക്കുന്ന സൂപ്പർക്ലാസ്​ ബസുകൾ ഉപയോഗിച്ച്​ ജനങ്ങളെ പിഴിയാൻ കെ.എസ്​.ആർ.ടി.സിക്ക്​ അവസരം കിട്ടിയത്​ ബസുകളുടെ പഴക്കത്തിൽ വരുത്തിയ തിരുത്തിനെത്തുടർന്നാണ്​. കെ.എസ്​.ആർ.ടി.സി സി.എം.ഡി നൽകിയ അപേക്ഷയിൽ ഗതാഗത സെക്രട്ടറിയാണ്​ ഇതിന്​ അനുമതി നൽകിയത്​. രണ്ട്​ തസ്തികയിലും ഇരിക്കുന്നത്​ ബിജു പ്രഭാകർ തന്നെയാണ്​. ടി. ജുവിൻ