മുണ്ടക്കയത്ത് കാർഷികമേഖലക്ക്‌ ഊന്നൽ

മുണ്ടക്കയം: കാർഷിക മേഖലക്ക്‌ ഊന്നൽ നൽകി മുണ്ടക്കയം പഞ്ചായത്ത്​ ബജറ്റ്. 36 കോടി രണ്ടുലക്ഷം രൂപ വരവും 35.80 കോടി രൂപ ചെലവും 32 ലക്ഷം രൂപ നീക്കിയിരിപ്പുമുള്ള വാർഷിക ബജറ്റ് വൈസ് പ്രസിഡന്‍റ്​ ദിലീഷ് ദിവാകരൻ അവതരിപ്പിച്ചു. കാർഷിക സ്വയംപര്യാപ്തത നേടാൻ മുഴുവൻ വീടുകളിലും കുറ്റിക്കുരുമുളക്​ കൃഷി ആരംഭിക്കും. ഗ്രാമീണ റോഡുകളുടെ വികസനം, ബസ് സ്റ്റാൻഡ്​ വികസനം, പ്രളയരഹിത ഗ്രാമം, കുടിവെള്ളം, വനിത ക്ഷേമം, വയോജനങ്ങൾ പദ്ധതികൾക്ക്​ തുക വകയിരുത്തി. 'മുണ്ടക്കയം വിരൽതുമ്പിൽ' ആപ്പിലൂടെ മുണ്ടക്കയത്തിന്റെ അറിയേണ്ട ഏതുവിവരങ്ങളും മൊബൈലിൽ ലഭ്യമാകും. വയോജനങ്ങൾക്കായി എല്ലാ വാർഡിലും ക്ലബുകൾ, ട്രാൻസ്ജെൻഡേഴ്സിന്റെ ഉന്നമനത്തിനായി പദ്ധതികൾ, പി.എസ്.സി കോച്ചിങ്​ ക്ലാസ്, പെൺകുട്ടികൾക്ക് കരാട്ടെ ഉൾപ്പെടെയുള്ള സ്വയം പ്രതിരോധ ക്ലാസുകൾ തുടങ്ങിയ നിരവധി പ്രോജക്ടുകൾ ബജറ്റിൽ ഉൾക്കൊള്ളിച്ചിട്ടുണ്ട്. പ്രസിഡന്‍റ്​ രേഖാദാസ് അധ്യക്ഷത വഹിച്ചു.