സ്വകാര്യ ബസ്​ സമരം: അധികാരം പ്രയോഗിക്കാതെ സർക്കാർ

കോട്ടയം: ബസ്​ പെർമിറ്റിലെ വ്യവസ്ഥകൾ ലംഘിച്ചാൽ പെർമിറ്റ്​ പിടിച്ചെടുക്കാൻ അധികാരമുണ്ടെങ്കിലും സ്വകാര്യ ബസ്​ സമരത്തിനെതിരെ അത്​ പ്രയോഗിക്കാതെ സർക്കാർ. ബസ്​ നിരക്ക്​ വർധിപ്പിക്കണമെന്ന അവകാശവാദമുന്നയിക്കാൻ സ്വകാര്യ ബസ്​ ഉടമകൾക്ക്​ കഴിയില്ലെന്ന്​ ഹൈകോടതി ജഡ്​ജി കെ.എ. അബ്​ദുൽ ഗഫൂർ 1997 സെപ്​റ്റംബർ 30ന്​ വിധിച്ചിരുന്നു. പെർമിറ്റുകൾ കൈവശംവെച്ച്​ സമരം ചെയ്യാൻ ബസുടമകൾക്ക്​ അവകാശമില്ല. നഷ്ടമാണെന്ന്​ തോന്നുന്ന ഉടമകൾ പെർമിറ്റ്​​ മടക്കിനൽകണം. സർവിസ്​ നടത്താൻ മറ്റാരെങ്കിലും മുന്നോട്ടുവന്നാൽ അവർക്ക്​ സർക്കാർ പെർമിറ്റ്​ നൽകണമെന്നും വിധിയിലുണ്ട്​. നിലവിലുള്ള നിയമങ്ങൾ പര്യാപ്​തമല്ലെങ്കിൽ ഓർഡിനൻസ്​ അടക്കം ഇറക്കി ജനങ്ങളുടെ ബുദ്ധിമുട്ട്​ പരിഹരിക്കണമെന്നും സെന്‍റർ ഫോർ കൺസ്യൂമർ എജുക്കേഷൻ നൽകിയ ഹരജിയിൽ ഹൈകോടതി നിർദേശിച്ചിരുന്നു. ഈ വിധിയുടെ അടിസ്ഥാനത്തിൽ നായനാർ സർക്കാറിന്‍റെ കാലത്ത്​ സ്വകാര്യ ബസ്​ സമരം നേരിടാൻ പെർമിറ്റ്​ പിടിച്ചെടുക്കൽ അടക്കമുള്ള നടപടികൾക്ക്​ തുടക്കമിട്ടിരുന്നു. നികുതിപ്പണത്തിൽനിന്ന്​ കെ.എസ്​.ആർ.ടി.സിക്ക്​ പ്രതിവർഷം ആയിരം കോടിയിലേറെ സഹായം നൽകുന്ന സർക്കാർ, വൻ തുക നികുതി നൽകുന്ന സ്വകാര്യ ബസ്​ സർവിസുകൾക്ക്​ ആനുകൂല്യങ്ങളൊന്നും അനുവദിക്കുന്നില്ല. ഡീസൽ സബ്​സിഡിയും നികുതിയിളവും നൽകി സ്വകാര്യ മേഖലയെ താങ്ങിനിർത്താനാവുമെന്ന്​ ബസുടമകളും ഗതാഗത രംഗത്തെ വിദഗ്​ധരും സർക്കാറിന്‍റെ ശ്രദ്ധയിൽപെടുത്തിയിരുന്നു. കോവിഡ്​ കാലത്ത്​ യാത്രക്കാരുടെ എണ്ണത്തിൽ ഏർപ്പെടുത്തിയ നിയന്ത്രണം പിൻവലിച്ച സർക്കാർ അതിന്‍റെ പേരിൽ ഉയർത്തിയ ബസ്​ നിരക്ക്​ പിൻവലിക്കാനും തയാറല്ല. നിന്നും ഇരുന്നുമായി 60 പേർക്ക്​ സഞ്ചരിക്കാൻ അനുവാദമുള്ള ബസിൽ 30 പേർ മാത്രമേ കയറാവൂ എന്നായിരുന്നു കോവിഡ്​ കാലത്തെ നിർദേശം. ഇതിലൂടെയുണ്ടാകുന്ന നഷ്ടം പരിഹരിക്കാൻ എട്ടുരൂപ നൽകിയാൽ സഞ്ചരിക്കാവുന്ന ദൂരം അഞ്ചിൽനിന്ന്​ രണ്ടര കിലോമീറ്ററായി കുറച്ചിരുന്നു. നൂറുകണക്കിന്​ ഓർഡിനറി ബസുകൾ പിൻവലിച്ച കെ.എസ്​.ആർ.ടി.സി, സ്വകാര്യ ബസ്​ സമരത്തിന്‍റെ പശ്ചാത്തലത്തിൽ പോലും യാത്രക്ലേശം ഒഴിവാക്കാൻ കൂടുതൽ സർവിസുകൾ തുടങ്ങിയിട്ടില്ല. ലഭ്യമായ ഏറ്റവും ഒടുവിലത്തെ കണക്കുപ്രകാരം കെ.എസ്​.ആർ.ടി.സിക്ക്​ 3724 ഓർഡിനറി ബസുണ്ട്​. 1926 സൂപ്പർക്ലാസ്​ ബസുകൾ, 39 വോൾവോ, സ്കാനിയ ബസുകൾ. 719 കെ.യു.ആർ.ടി.സി ബസുകൾ 10 ഇലക്​ട്രിക്​ വാടക വണ്ടികൾ എന്നിവയടക്കം ആകെ ബസുകളുടെ എണ്ണം 6418 ആണ്​. മാർച്ച്​ 23ന്​ കെ.എസ്​.ആർ.ടി.സി സർവിസിനിറക്കിയത്​ 3626 എണ്ണം മാത്രമാണ്​. ഓടിയത്​ 12.03 ലക്ഷം കിലോമീറ്ററും. 177 ബസുകൾ വെറുതെകിടക്കുകയാണെന്നും 631 എണ്ണം വർക്​ഷോപ്പിലാണെന്നും കണക്കുകൾ പറയുന്നു. ഇവ കൂട്ടിയാൽ കിട്ടുന്നത്​ 4434 ബസുകൾ മാത്രമാണ്​. 1984 ബസുകൾ ഉപയോഗിക്കാനാവാത്ത സ്ഥിതിയിലാണ്​. ടയർ അടക്കം അഴിച്ചുമാറ്റിയ ഇവ ഡിസ്​ട്രിക്ട്​ കോമൺ പൂൾ എന്ന പേരിൽ വിവിധയിടങ്ങളിൽ കൂട്ടിയിട്ടിരിക്കുകയാണ്​. ഇതിൽ 1000 ബസുകൾ ഓർഡിനറിയായി ഓടിയിരുന്നവയാണ്​. സ്വകാര്യ ബസ്​ സമരത്തിൽ ജനം നട്ടംതിരിയുമ്പോഴും ഇവ നിരത്തിലിറക്കാൻ ഗതാഗത സെക്രട്ടറി കൂടിയായ കെ.എസ്​.ആർ.ടി.സി സി.എം.ഡി ബിജു പ്രഭാകറിന്​ കഴിഞ്ഞിട്ടില്ല. ഈ മാസം 17 മുതൽ ഒരാഴ്ച കെ.എസ്​.ആർ.ടിസിയുടെ നില (തീയതി, ഓടിയ ബസുകൾ, സർവിസ്​ നടത്തിയ കിലോമീറ്റർ (ലക്ഷത്തിൽ), വെറുതെയിട്ടവ, വർക്​ഷോപ്പിലുള്ളവ ക്രമത്തിൽ): മാർച്ച്​ 17 -3614, 11.96, 79, 692 18 -3591, 11.95, 78, 710 19 -3582, 11.96, 93, 724 20 -2691, 9.73, 970, 734 21 -3691, 12.18, 154, 619 22 -3632, 12.07, 166, 653 23 -3626, 12.03, 177, 631