കുറിച്ചി പഞ്ചായത്ത് ഓഫിസ്​ അടപ്പിക്കാൻ ശ്രമം; സംഘർഷം, പ്രസിഡന്‍റിന്​ പരിക്ക്​

ചങ്ങനാശ്ശേരി: ഹർത്താൽ ദിനത്തിൽ പ്രവർത്തിച്ച കുറിച്ചി പഞ്ചായത്ത് ഓഫിസ് അടപ്പിക്കാനുള്ള ശ്രമത്തിനിടെ സംഘർഷം. വെള്ളിയാഴ്ച ഉച്ചക്ക്​ 12ഓടെ കുറിച്ചി പഞ്ചായത്ത് അംഗം കൂടിയായ ബി.ജെ.പി നേതാവ് ബി.ആർ. മഞ്ജീഷി‍ൻെറ നേതൃത്വത്തിലെത്തിയ പ്രവർത്തകർ ഓഫിസ് അടക്കാൻ ആവശ്യപ്പെടുകയായിരുന്നു. എന്നാൽ, ജീവനക്കാർ വിസമ്മതിച്ചു. ഇതോടെ ബി.ജെ.പി പ്രവർത്തകർ കുറിച്ചി പഞ്ചായത്ത് പ്രസിഡന്‍റ്​ സുജാത സുശീലനെ കസേരയിൽനിന്ന്​ വലിച്ച് താഴെയിടുകയും ഓഫിസ് ഫയലുകൾ വലിച്ചെറിഞ്ഞെന്നുമാണ്​ പരാതി. ചിങ്ങവനം പൊലീസ് എത്തിയാണ് പിരിച്ചു വിട്ടത്. ആക്രമത്തിൽ പരിക്കേറ്റ പഞ്ചായത്ത് പ്രസിഡന്‍റ്​ സുജാത സുശീലൻ ചങ്ങനാശ്ശേരി താലൂക്ക് ആശുപത്രിയിൽ ചികിത്സതേടി. തോളിന് പരിക്കേറ്റിട്ടുണ്ട്. വനിതകൾ അടക്കമുള്ള ജീവനക്കാരെ ഭീഷണിപ്പെടുത്തുകയും മുറിയുടെ വാതിൽ പുറത്തുനിന്ന് പൂട്ടാൻ ശ്രമിക്കുകയും ചെയ്തതായി പ്രസിഡന്‍റ്​ പറഞ്ഞു. അക്രമ വിവരം അറിഞ്ഞ് സി.പി.എം പ്രവർത്തകരും ഓഫിസിലേക്ക്​ എത്തിയിരുന്നു. പുറത്തിറങ്ങിയശേഷം ബി.ജെ.പി പ്രവർത്തകർ പഞ്ചായത്ത് ഓഫിസി‍ൻെറ ഷട്ടർ ഇടാൻ ശ്രമിച്ചതും സംഘർഷത്തിന് ഇടയാക്കി.