ചോദിക്കാനും പറയാനും വീട്ടിൽ ആണുങ്ങളില്ലേ എന്ന്​ ഡിവൈ.എസ്​.പി

കോട്ടയം: നിനക്കൊന്നും വേറെ പണിയില്ലേ, ചോദിക്കാനും പറയാനും വീട്ടിൽ ആണുങ്ങളില്ലേ... മാടപ്പള്ളിയിൽ സിൽവർ ലൈൻ പാത​ക്കെതിരെ പ്രതിഷേധിച്ച വീട്ടമ്മമാരോട്​ ചങ്ങനാശ്ശേരി ഡിവൈ.എസ്​.പി ആർ. ശ്രീകുമാറിന്‍റെ ചോദ്യമായിരുന്നു ഇത്​​. ആൺ പൊലീസുകാരെക്കൊണ്ട്​ സ്ത്രീകളെ കൈകാലുകളിൽ പിടിച്ച്​ തൂക്കിയെടുക്കാനും താഴെ വീണവരെ നടുവിൽ പിടിച്ചെടുക്കാനും നിർദേശം കൊടുത്തതും ഈ ഡിവൈ.എസ്​.പി തന്നെ. സ്ത്രീകളെയും കുട്ടികളെയും വലിച്ചിഴക്കുന്നതു തടയാൻ ചെന്ന മറ്റു സ്ത്രീകളോട്​ ''വണ്ടിയിൽ ഇനിയും സ്ഥലമുണ്ട്​. പിടിച്ചകത്തിടും. രണ്ടു ദിവസം ജയിലിൽ കിടന്നു നോക്കടീ ​അപ്പോഴറിയാം'' എന്നായിരുന്നു​ ഡിവൈ.എസ്​.പിയുടെ പ്രതികരണം. സമര രംഗത്തുണ്ടായിരുന്നവരിൽ ഭൂരിഭാഗവും സ്ത്രീകളായിരുന്നു. തങ്ങളുടെ വീടും സ്ഥലവും നഷ്ടപ്പെടുമെന്ന ആധിയിൽ പ്രതിഷേധിക്കാനെത്തിയതായിരുന്നു സാധാരണക്കാരായ വീട്ടമ്മമാർ. അവ​രുടെ ആത്​മാഭിമാനത്തെ ചോദ്യം ചെയ്ത്​ സമരവീര്യം അടിച്ചൊതുക്കാനായിരുന്നു പൊലീസിന്‍റെ ശ്രമം. നീചമായാണ്​ പൊലീസ്​ തങ്ങളോടു പെരുമാറിയതെന്ന്​ വീട്ടമ്മമാർ പറഞ്ഞു. ''ഞങ്ങളെല്ലാം പ്രായപൂർത്തിയായവരാണ്​. വേറെ പണിയൊന്നുമില്ലേ എന്നു ചോദിക്കാൻ ഡിവൈ.എസ്​.പി ആരാണ്​. സ്വന്തം വീടും സ്ഥലവും പോകുമ്പോഴേ മറ്റുള്ളവർക്ക്​ മനസ്സിലാകൂ. മാടപ്പള്ളിയിലെ പെണ്ണുങ്ങളുടെ ശക്​തി എന്താണെന്ന്​ പൊലീസ്​ അറിയാൻ പോകുന്നതേയുള്ളൂ. പൊലീസുകാരെ അടുത്തുപോലും കാണാത്തവരാണ്​ ഞങ്ങൾ. ഇപ്പോൾ മനസ്സിലായി ഇത്രയേ ഉള്ളൂ പൊലീസ്​ എന്ന്​. ഇനി പേടിക്കില്ല അവരെ. ആൺപൊലീസുകാർ കാലുകൾ രണ്ടും വലിച്ചുപിടിച്ചു. കൈകളിൽ പിടിച്ച്​ തൂക്കിയെടുത്തു. പ്രതിഷേധത്തിൽ പ​ങ്കെടുക്കാത്തവരെപ്പോലും തല്ലിച്ചതച്ചു. നെയിം ബോർഡ്​ ഇല്ലാത്ത പൊലീസുകാരാണ്​ ഞങ്ങളെ തല്ലിയത്​. അവർ പൊലീസാണോ സർക്കാറിന്‍റെ ഗുണ്ടകളാണോ എന്ന്​ മുഖ്യമന്ത്രി പറയണം. വീടിനകത്തിരുന്ന ഞങ്ങളെ പുറത്തിറക്കിയത്​ സർക്കാറാണ്​. ഇനി ഞങ്ങൾ പുറത്തുതന്നെയുണ്ടാകും. മാടപ്പള്ളിയിൽ കല്ലിട്ടാൽ പിഴുതെറിയും. ജീവിതകാലം മുഴുവൻ ഞങ്ങൾ അധ്വാനിച്ചുണ്ടാക്കിയതാണ്​. പെട്ടെന്നൊരു ദിവസം അതിക്രമിച്ചുകയറി കല്ലിടുമ്പോൾ നോക്കിനിൽക്കണോ. എന്തുവിലകൊടുത്തും പദ്ധതി നടപ്പാക്കും എന്നാണ്​ മുഖ്യമന്ത്രി പറയുന്നത്​. ഞങ്ങളുടെ ഭയം അതാണ്''​- വീട്ടമ്മമാർ പറഞ്ഞു. തങ്ങളെ കാണാനെത്തിയ യു.ഡി.എഫ്​ സംഘത്തോടും കെ.കെ. രമ എം.എൽ.എയോടും ഡിവൈ.എസ്​.പിയുടെ അധിക്ഷേപത്തെക്കുറിച്ച്​ വീട്ടമ്മമാർ പരാതിപ്പെട്ടു.