ഡിവൈ.എസ്.പി വയറ്റിൽ ചവിട്ടി -വി.ജെ. ലാലി

ചങ്ങനാശ്ശേരി: സമരസമിതി നേതാക്കളോട് സംസാരിക്കാന്‍പോലും തയാറാകാതെ നേതാക്കളെയെല്ലാം അടിച്ചമര്‍ത്തുന്ന നയമാണ് പൊലീസ് സ്വീകരിച്ചതെന്ന് കേരള കോണ്‍ഗ്രസ് ഉന്നതാധികാര സമിതി അംഗം വി.ജെ. ലാലി പറഞ്ഞു. സമരത്തിനിടയിലുണ്ടായ ലാത്തിച്ചാര്‍ജില്‍ പരിക്കേറ്റ്​ ചെത്തിപ്പുഴയിലെ സ്വകാര്യ ആശുപത്രിയില്‍ ചികിത്സയിലാണ് അദ്ദേഹം. സമരത്തിനിടയില്‍ ഡിവൈ.എസ്.പി വയറിന്​ ചവിട്ടിയതായി വി.ജെ. ലാലി പറഞ്ഞു. പൊലീസുകാര്‍ തൂക്കിയെടുത്ത്​ കൊണ്ടു പോകുന്നതിനിടെ കൈ തിരിഞ്ഞ്​ കൈക്കുഴ തെന്നിയും പരിക്കേറ്റിട്ടുണ്ട്. സ്വന്തം കിടപ്പാടം നഷ്ടപ്പെട്ട്​ തെരുവിലിറങ്ങേണ്ടി വരുന്ന നിരാശ്രയരുടെ പ്രതിഷേധത്തെയാണ് പൊലീസ് നിഷ്ഠൂരം അടിച്ചമര്‍ത്തിയതെന്നും വി.ജെ. ലാലി പറഞ്ഞു. സ്‌കാനിങ് റിസൽറ്റ്​ ലഭിച്ചാലേ വയറ്റിലെ പരിക്കിനെക്കുറിച്ച് അറിയാന്‍ കഴിയൂവെന്നും ലാലി പറഞ്ഞു.