അലിയുടെ കിണർ നാടിന്‍റെ ദാഹം തീർക്കുന്നു

90 മോട്ടോറാണ് കിണറ്റിൽ സ്ഥാപിച്ചിരിക്കുന്നത് ഈരാറ്റുപേട്ട: കുടിവെള്ളത്തിന്​ ജനം പരക്കംപായുമ്പോൾ ഒരുനാടിന്റെ മുഴുവൻ ദാഹം തീർക്കുകയാണ് ഈരാറ്റുപേട്ട നടയ്ക്കൽ മാങ്കുഴക്കൽ പരേതനായ അലിയുടെ കിണർ. 90 മോട്ടോറാണ് ഈ കിണറ്റിൽ സ്ഥാപിച്ചിരിക്കുന്നത്. 500 മീറ്റർ ചുറ്റളവിലെ നൂറിൽപരം കുടുംബങ്ങളിൽ ഈ കിണറ്റിലെ വെള്ളമെത്തുന്നുണ്ട്. ഈ കിണർ ഇപ്പോൾ നാട്ടുകാരുടെ ദാഹം തീർക്കുന്ന അക്ഷയപാത്രമാണ്. മഴക്കാലത്തും അമ്പതോളം മോട്ടോറുകൾ ഇവിടെ കാണും. ഈ കിണർ ഇല്ലായിരുന്നെങ്കിൽ കുടിവെള്ളത്തിന്​ കിലോമീറ്ററുകൾ സഞ്ചരിക്കേണ്ട അവസ്ഥയുണ്ടാകുമായിരുന്നെന്ന് നാട്ടുകാർ പറയുന്നു. പതിറ്റാണ്ടുകൾക്ക് മുമ്പാണ് അലി കിണർ കുഴിച്ചത്. സ്വത്ത് മക്കൾക്കായി വീതം വെച്ച് നൽകിയപ്പോൾ കിണറിരിക്കുന്ന ഭാഗം നാട്ടുകാർക്ക്​ മാറ്റിവെച്ചു. നാളുകൾ പിന്നിട്ട് കുടിവെള്ളം കിട്ടാക്കനിയായപ്പോൾ സമീപവാസികൾ തങ്ങളുടെ വീട്ടിലേക്കുള്ള മോട്ടോറുകൾ ഇവിടേക്ക്​ മാറ്റി. രാവും പകലുമില്ലാതെ ആവശ്യക്കാർ മോട്ടോർ ഉപയോഗിച്ച് വെള്ളം തങ്ങളുടെ വീട്ടിലെത്തിക്കുന്നു. കിണറ്റിലെ വെള്ളം മുഴുവൻ തീർന്നാലും പേടിക്കാനില്ലെന്ന് നാട്ടുകാർ പറയുന്നു. അര മണിക്കൂർ മാത്രം കാത്തിരുന്നാൽ ഒരു ടാങ്കിലേക്കുള്ള വെള്ളം കിണറ്റിലെത്തിയിരിക്കും -ഇവർ പറയുന്നു. ----- പടം ഈരാറ്റുപേട്ട മാങ്കുഴക്കൽ അലിയുടെ കിണറ്റിൽ നാട്ടുകാർ സ്ഥാപിച്ച മോട്ടോറുകൾ