കോഴിവില കുതിക്കുന്നു​

കോട്ടയം: ജില്ലയിൽ കോഴിവില കുതിക്കുന്നു. 165 രൂപ വരെയാണ്​ ചൊവ്വാഴ്ചത്തെ ചില്ലറ വില. ക്രിസ്ത്യൻ സമൂഹത്തി​ന്‍റെ നോയമ്പ്​ സമയമായതിനാലും ചൂടു കൂടിയതിനാലും സാധാരണ മാർച്ച്​ മാസത്തിൽ വില കുറയുകയും പെരുന്നാളിനോടുബന്ധിച്ച്​ ഉയരാറുമാണ്​ പതിവ്​.​ ആ പതിവുതെറ്റിച്ചാണ്​ ഇപ്പോഴത്തെ കുതിച്ചുകയറ്റം. ഉൽപാദനം കുറഞ്ഞതും കോഴിത്തീറ്റ വില കൂടിയതുമാണ്​ പുതിയ പ്രതിഭാസമെന്ന് കച്ചവടക്കാർ പറയുന്നു​. സോയാബീൻ, ചോളം തുടങ്ങിയ കോഴിത്തീറ്റക്കുള്ള അസംസ്കൃത വസ്തുക്കൾ അധികവും വരുന്നത്​ ചൈനയിൽനിന്ന്​ യുക്രെയ്​​നിൽനിന്നുമാണ്​​. കോവിഡിനെതുടർന്ന്​ ചൈനയിൽനിന്ന്​ യുദ്ധം മൂലം യുക്രെയ്​​നിൽനിന്നുമുള്ള ഇറക്കുമതി നിലച്ചിരിക്കുകയാണ്​. തമിഴ്​നാട്​,​ കർണാടക, ആന്ധ്ര എന്നിവിടങ്ങളിൽനിന്നാണ്​ കേരളത്തിലേക്ക്​ കോഴിത്തീറ്റ വരുന്നത്​. കോഴിത്തീറ്റ വില കൂടിയതോ​ടെ പ്രാദേശിക ഫാമുകളിലും ഉൽപാദനം കുറഞ്ഞു. റമദാനിൽ കോഴിലഭ്യത കൂടുമെന്നും അപ്പോൾ വില കുറയുമെന്നാണ്​ പ്രതീക്ഷ. കുടുംബശ്രീ ചിക്കന്​ താരതമ്യേന വിലക്കുറവുള്ളത്​ ആശ്വാസമാണ്​. 148 രൂപയാണ്​ ചൊവ്വാഴ്ചത്തെ വില. 21 ഔട്​ലെറ്റുകളാണ്​ ജില്ലയിലുള്ളത്​. --- ഹോട്ടലുകൾ പ്രതിസന്ധിയിൽ കോവിഡ്​ തകർത്ത രണ്ടുവർഷത്തിനശേഷം തിരിച്ചുവരവിന്‍റെ പാതയിലാണ്​ ഹോട്ടലുകൾ. അതിനിടെ കോഴിയുടെ​ വിലക്കയറ്റം ഹോട്ടലുകളെ പ്രതിസന്ധിയിലാക്കി. കുടുംബശ്രീ ഔട്ട്​ലെറ്റുകളിൽ വില കുറവാണെങ്കിലും ഇവി​ടെനിന്ന്​ ഹോട്ടലുകൾക്ക്​ വലിയതോതിൽ കോഴി ലഭ്യമാവുന്നില്ല. നിലവിൽ പച്ചക്കറികൾക്ക്​ മാത്രമാണ്​ വിലക്കുറവുള്ളത്​. പലവ്യഞ്ജനങ്ങൾക്കും വിലകൂടി. പാമോയിൽ വിലയും ഉയർന്നു. കഴിഞ്ഞവർഷം ഇതേസമയത്ത്​ 45 രൂപയുണ്ടായിരുന്ന 900 ഗ്രാമിന്‍റെ പാമോയിൽ പാക്കറ്റിന്​ ഇപ്പോൾ 160 രൂപയാണ്​ വില. 10പാക്കറ്റ്​ അടങ്ങിയ ഒരു ബോക്സ്​ എടുക്കുമ്പോൾ 1600 രൂപ നൽകണം. യുക്രെയ്​നിലെ യുദ്ധമാണ്​ വിലക്കയറ്റത്തിന്​ കാരണമായി ചൂണ്ടിക്കാട്ടുന്നത്​. എന്നാൽ, അതൊരു മറയാണെന്നാണ്​ ഹോട്ടലുടമകളുടെ അഭിപ്രായം. യുക്രെയ്​നിൽനിന്ന്​ വലിയതോതി​ൽ പാമോയിൽ ഇറക്കുമതിയില്ല. കഴിഞ്ഞ സർക്കാറിന്‍റെ കാലത്ത്​ കോഴിവില ഇത്തരത്തിൽ ഉയർന്നപ്പോൾ ധനമന്ത്രിയായിരുന്ന തോമസ്​ ഐസക്കിനെ കണ്ടതിനെ തുടർന്ന്​ വിപണിയിൽ ഇടപെടുകയും വിലകുറയുകയും ചെയ്തിരുന്നു. അത്തരം ഇടപെടൽ ഉണ്ടായിട്ടില്ലെങ്കിൽ വിലവർധന ഹോട്ടൽ വിപണിയെയും ബാധിക്കും. തമിഴ്​നാട്​ ലോബിയുടെ ഇടപെടലാണ്​ കോഴിവില വർധനക്ക്​ പിന്നിലെന്നും ഹോട്ടലുടമകൾ പറയുന്നു. ------------- ഇന്ന്​ ജലവിതരണം മുടങ്ങും കോട്ടയം: കഞ്ഞിക്കുഴിയിൽ പൈപ്പ് ലൈനിൽ അറ്റകുറ്റപ്പണി നടക്കുന്നതിനാൽ ദേവലോകം, മലങ്കര ക്വാർട്ടേഴ്സ്, കഞ്ഞിക്കുഴി ഉയർന്ന പ്രദേശങ്ങൾ, കെ.കെ റോഡ്, സെൻട്രൽ ജങ്​ഷൻ, ജില്ല ആശുപത്രി, കലക്ടറേറ്റ് എന്നിവിടങ്ങളിൽ ബുധനാഴ്ച ജല വിതരണം മുടങ്ങും. വൈകുന്നേരത്തോടുകൂടി പുനഃസ്ഥാപിക്കുമെന്ന് അധികൃതർ അറിയിച്ചു.